Azərbaycan, Bakı, 24 noyabr /Trend, müxbir M.Əliyev/
Azərbaycanın "Qırmızı kitabı"nın veb səhifəsi - /www.redbook.az/ yaradılıb.
"İnternet saytda Azərbaycanın "Qırmızı kitabı"na daxil olan bütün heyvanlar və bitki növləri barədə informasiya verilib və mütəmadi olaraq nəsli kəsilməkdə olan canlılar barədə məlumatlar yerləşdiriləcək", - çərşənbə günü Trend-ə saytın tərtibatçısı, "Demokratik İslahatçı Gənclər" İctimai Birliyinin sədri Vüsalə Hüseynova bildirib.
Onun sözlərinə görə, saytda "Qırmızı kitab"a salınmış 71 növ endemik flora və fauna növləri haqda məlumat yerləşdirilib.
Hüseynova bildirib ki, MDB-də ilk dəfə olaraq Azərbaycanda "Qırmızı kitab"ın portalı yaradılıb.
Azərbaycan Rabitə və İnformasiya Texnologiyaları Nazirliyinin maliyyə dəstəyi ilə hazırlanmış, Azərbaycan və ingilis dillərində fəaliyyət göstərən saytda Azərbaycan təbiətində nadir növ sayılan, nəsli kəsilmiş və ya kəsilmək təhlükəsində olan bitki və heyvalar aləminə aid endemik növlər yer alıb.
"Bu sayt vasitəsilə beynəlxalq aləmə Azərbaycan ərazisində bitən və yaxud yaşayan, dünyanın heç bir yerində rast gəlinməmiş, yerli endemlerimizi təqdim etmək fürsəti əldə etməklə dünya ekoloqlarına ölkəmizin təkcə insan kapitalı, sərvətləri ilə deyil, eyni zamanda təbiəti ilə də seçildiyini göstərmək istəyirik", - İB-nin sədri bildirib.
Portalın dekabr ayında geniş ictimaiyyətə təqdim edilməsi planlaşdırılır.
Ekologiya və Təbii Sərvətlər Nazirliyi Azərbaycanın "Qırmızı kitab"ının ikinci nəşrini Azərbaycan və ingilis dillərində nəşr etməyi nəzərdə tutur.