Azərbaycan, Bakı, 14 dekabr /Trend, müxbir M.Əliyev/
Bakı şəhəri üzrə Təhsil İdarəsi (BŞTİ) 2011-ci ildə orta məktəblərdə yoxlamaları davam etdirəcək. Bunu Trend-ə çərşənbə axşamı İdarənin ümumtəhsil sektorunun müdiri Firudin Həmzəyev bildirib.
"Bakı şəhəri üzrə Təhsil İdarəsinin keçirdiyi reydlər kampaniya şəklində təşkil olunmur, yoxlamalar sistematik, davamlı xarakter daşıyır", - Həmzəyev deyib.
Onun sözlərinə görə, 2010/2011-ci tədris ilinin ötən dövrü ərzində keçirilən yoxlamalar zamanı aşkar olunmuş bir sıra kiçik nöqsanlarla bağlı BŞTİ məktəblərə tapşırıqlarını verib. Həmzəyev qeyd edib ki, təhsil ocaqlarına məktəbli kitabçalarının aparılmasına, müəllimlərin tədris proqramlarının təşkilinə diqqəti artırmaq tapşırığı verilib.
"Həmçinin, məktəblərdə informatika otaqlarının, fizika, kimya laboratoriyalarının imkanlarından səmərəli istifadə etmək tapşırığı verilib", - o bildirib.
Bakı şəhəri üzrə Təhsil İdarəsi noyabrın 20-dən orta məktəblərdə reydlərə başlayacaq. Həmzəyev bildirib ki, yoxlamalar zamanı I-IV sinif şagirdlərinin vahid məktəbli formasına keçidinin baş tutduğu qeyd olunub. "Həmçinin, növbəti tədris illərində yuxarı siniflərində vahid formaya keçməsi ilə bağlı hazırlıq işlərinin aparılması tapşırıqları verilib", - Həmzəyev deyib.
2010-cu il sentyabrın 15-dən Bakı məktəblərinin ibtidai sinif şagirdlərinin (I-IV sinif) vahid məktəbli geyiminə keçidi həyata keçirilir. "Bakı Tikiş" Açıq Səhmdar Cəmiyyəti I-IV sinif şagirdləri üçün onların sayı qədər, yəni 120 min geyim tikib. İbtidai sinifdə oxuyan oğlanlar üçün göy rəngli, aşağı hissəsi bağlanan pencək-şalvar, eyni rəngdə jilet, ağ köynək və qara ayaqqabı, qızlar üçün isə ağ uzunboğaz çorab, ağ xətlərlə damalı qara yubka, göy peycək, tünd qırmızı jilet, ağ köynək müəyyən olunub.
