Azərbaycan, Bakı, 24 yanvar /Trend, müxbir K.Zərbalıyeva/
Azərbaycan Ali Məhkəməsi narkotik vasitələrin və psixotrop maddələrin qanunsuz dövriyyəsi ilə bağlı cinayətlərin məhkəmə ümumiləşdirməsini aparır.
Ali Məhkəmədən bazar ertəsi Trend-ə verilən məlumata görə, ümumiləşdirmə zamanı 2009-cu ildə respublikanın bütün birinci instansiya məhkəmələrində bu qəbildən olan işlərlə bağlı qərarlar öyrənilib. Ümumiləşdirmənin yekunlaşmaq üzrə olduğu bildirilir.
Ümumiləşdirmə zamanı qanunvericiliyin və məhkəmə təcrübəsinin tətbiqi təcrübələri öyrənilir, bu işlərə baxılarkən yol verilən məhkəmə səhvləri, qanunvericilikdəki boşluqlar araşdırılır.
Ali Məhkəmədən bildirilib ki, Narkotiklərlə mübarizə üzrə birinci və ikinci Dövlət Proqramlarında bu sahədə qanunvericiliyin tətbiqi təcrübəsinin öyrənilməsi tövsiyə olunub.
Ümumiləşdirmənin nəticələri Ali Məhkəmənin Plenumunun mart ayında keçiriləcək iclasında müzakirəyə çıxarılacaq və bu barədə yekun qərar qəbul olunacaq.
Azərbaycan Cinayət Məcəlləsinin 26-cı fəsli narkotik vasitələrin və psixotrop maddələrin qanunsuz dövriyyəsi ilə əlaqədar cinayətləri əhatə edir. Məcəllənin 234-240-cı maddələri bu qəbildən olan cinayətləri əhatə edir.
