Azərbaycan, Bakı, 31 yanvar /Trend, müxbir K.Zərbalıyeva/
Azərbaycan Parlamentinin yaz sessiyasında "Həbs yerlərində saxlanılan şəxslərin hüquq və azadlıqlarının təmin edilməsi haqqında" qanun layihəsi müzakirəyə çıxarılacaq. Bu barədə Trend-ə Milli Məclisdən məlumat verilib.
Məlumata görə, Parlamentin müzakirəsinə çıxarılacaq layihə hazırlanarkən də bu sahədə Avropa standartları, Avropa Məhkəməsinin qərarlarında əksini tapmış müddəalar öyrənilib, müvəqqəti saxlanma yerlərində daha çox mübahisə yaradan, şikayətlərə səbəb olan hallar nəzərə alınıb.
Qanun şübhəli şəxs qismində tutulmuş və ya barəsində təqsirləndirilən şəxs qismində məsuliyyətə cəlb etmə haqqında qərar çıxarılmış və həbs qətimkan tədbiri seçilmiş şəxslərin saxlandıqları həbs yerlərində onların hüquq və azadlıqlarını təmin etməyi nəzərdə tutur.
"Həbs yerlərində saxlanılan şübhəli və ya təqsirləndirilən şəxslərin hüquq və azadlıqlarının təmin edilməsi haqqında" qanun layihəsi beynəlxalq təşkilatlar, o cümlədən Avropa Şurası ilə sıx əməkdaşlıq şəraitində hazırlanıb.
Qanun layihəsinin hazırlanmasına 2000-ci ildən başlanılıb və layihə 2009-cu il apelin 3-də Milli Məclisin ikinci oxunuşundan keçib.
2000-ci ildə yeni Cinayət-Prosessual Məcəllə qüvvəyə minərkən həbsdə saxlanma yerlərinin statusunu müəyyənləşdirmək müvəqqəti olaraq (bu barədə yeni qanun qəbul edilənədək) Ədliyyə Nazirliyinə tapşırılıb.
2007-ci ildə qanun layihəsi ilə bağlı beynəlxalq təşkilatlarla bərabər dinləmələr təşkil edilib.
