Azərbaycan, Bakı, 6 may /Trend, müxbir T.Hacıyev/
Mayın 10-da Bakıda "Heydər Əliyev Kuboku" beynəlxalq boks turniri keçiriləcək. Bu barədə cümə günü Trend-ə Gənclər və İdman Nazirliyinin mətbuat xidmətindən məlumat verilib.
Yeniyetmə idmançılar arasında keçiriləcək bu yarışda ölkəmiz 3 komanda ilə təmsil olunacaq. Eyni zamanda, İrlandiya, Türkiyə, Hindistan, Türkmənistan, İsrail, Ukrayna, Qazaxıstan, Özbəkistan, Rusiya, Gürcüstan və Şotlandiya komandaları da mübarizəyə qoşulacaqlar.
Bundan əlavə, mayın 8-də Bakı İdman Sarayında Azərbaycanın ən güclü boksçularının görüşləri keçiriləcək.
Yarışın əsas məqsədi sentyabr ayında Bakı şəhərində keçiriləcək dünya çempionatında ölkəmizi təmsil edəcək idmançıları müəyyən etməkdir.