Azərbaycan, Bakı, 25 iyun /Trend/
Bakıda amerikalı jurnalist Amanda Erikson və Böyük Britaniyalı hüquq müdafiəçisi Seliya Devisi döyən iki nəfər Yasamal Rayon Polis İdarəsi əməkdaşları tərəfindən tutulub. Bu barədə Trend-ə şənbə günü Daxili İşlər Nazirliyinin mətbuat xidmətindən bildirilib.
İyunun 15-dən 16-na keçən gecə saat 00.20 radələrində paytaxtın Yasamal rayonundakı Vidadi küçəsində Böyük Britaniya vətəndaşı Seliya Devis və ABŞ vətəndaşı Amanda Erikson dörd nəfər naməlum şəxs tərəfindən döyülüb.
DİN-in məlumatına görə, saxlanılanlar 1993-cü il təvəllüdlü Ramana qəsəbə sakini Tağızadə Adil Hüseyn oğlu və 1983-cu il təvəllüdlü Bakının Nəsimi rayonu sakini Həsənov Roman Musa oğludur.
Cinayəti törədən digər iki şəxsin da adları istintaqa məlumdur, onların saxlanılması istiqamətində əməliyyat tədbirləri davam etdirilir.