Azərbaycan, Bakı, 15 oktyabr /Trend, müxbir İ.İsabalayeva/
Bakı şəhəri üzrə Təhsil İdarəsinin (BŞTİ) təşkilatçılığı ilə şənbə günü "Müstəqilliyimiz əbədidir" adlı müsabiqənin yekunlarına həsr edilən konfrans keçirilib.
Trend-in məlumatına görə, BŞTİ-nin rəisi Nailə Rzaquliyeva bildirib ki, sentyabrın 27-dən start götürən müsabiqə Azərbaycan Respublikasının müstəqilliyinin bərpasının 20-ci ildönümü ilə əlaqədar təşkil olunub. Müsabiqənin keçirilməsində məqsəd şagirdləri tariximiz, dövlət müstəqilliyimizlə əlaqədar maarifləndirmək, onların bu istiqamətdə istedad və bacarıqlarını üzə çıxarmaqdır.
Müsabiqə 2 nominasiya - inşa yazı və bədii qiraət nominasiyaları üzrə keçirilib. İnşa yazı nominasiyası üzrə müsabiqənin şəhər mərhələsi oktyabrın 7-də baş tutub. Yarışmada 267 şagird iştirak edib. Onlardan 42-si finala vəsiqə qazanıb.
Bədii qiraət nominasiyası üzrə isə şəhər mərhələsində 226 şagird iştirak edib. Həmin iştirakçılardan 30-u final mərhələsinə vəsiqə əldə edib.
İştirakçı şagirdlər arasından bədii qiraət nominasiyası üzrə 12, inşa yazı nominasiyası üzrə isə 11 nəfər qalib olub.