"Ermənilərin törətdiyi soyqırımın qurbanı – Bağanıs Ayrım" saytının təqdimatı olacaq
Azərbaycan, Bakı, 15 dekabr /Trend/
Millət vəkili, siyasi elmlər üzrə fəlsəfə doktoru Qənirə Paşayevanın təşəbbüsü və təşkilatçılığı ilə hazırlanan "Ermənilərin törətdiyi soyqırımın qurbanı - Bağanıs Ayrım" saytının təqdimatı olacaq.
Trend-in məlumatına görə, sayt üç dildə - Azərbaycan, rus və ingilis dillərində hazırlanıb.
Saytın hazırlanmasında məqsəd Azərbaycan həqiqətlərini, xüsusilə tarix boyu ermənilərin azərbaycanlılara qarşı apardığı soyqırım siyasətini beynəlxalq ictimaiyyətin nəzərinə çatdırmaq, habelə Azərbaycanın Dağlıq Qarabağ bölgəsi ilə yanaşı, respublikanın Ermənistanla həmsərhəd olan digər bölgələrində də (Qazax rayonunda) törətdikləri işğalçılıq və soyqırım siyasəti barədə daha geniş məlumat təqdim etməkdir.
Saytın hazırlanmasında Paşayevanın və "Şərq" qəzetinin baş redaktoru, tədqiqatçı jurnalist Akif Aşırlının həmmüəllifi olduğu və dörd dildə nəşr olunmuş "Ermənilərin törətdiyi soyqırımın qurbanı - Bağanıs Ayrım" kitabından və Azərbaycan Respublikası Hərbi Prokurorluğunun bu soyqırım üzrə materiallarından istifadə olunub.
Saytın təqdimatı deakbrın 23-də Odlar Yurdu Universitetində baş tutacaq.
1990-cı il martın 23-dən 24-ə keçən gecə erməni silahlıları keçmiş Sovet ordusuna məxsus hərbi texnikadan, müasir silahlardan istifadə edərək Qazax rayonunun Bağanıs Ayrım kəndinə hücum edib, mülki əhalini insanlığa sığmayan işgəncələrlə qətlə yetirib, diri-diri yandıraraq soyqırım törədiblər.
