Azərbaycan, Bakı, 3 fevral /Trend müxbir H. Vəliyev/
Bakının poçt şöbələri "Paypoint" ödəmə terminalları ilə təchiz ediləcək. Bu barədə cümə günü Trend-ə "Azərpoçt" MMC-dən məlumat veriblər.
Hazırda poçt şöbələrinin bu qurğularla mümkün təchizatı haqqında məsələ danışıqlar mərhələsindədir və onlar ilkin olaraq poçt operatorunun filial şəbəkəsində ilk rübün sonuna qədər qurula bilər.
"Paypoint" ödəmə terminallarının quraşdırılması və servis dəstəyilə "Komtec" şirkəti məşğul olur.
"Paypoint" terminalları kommunal xərclərin, stasionar və mobil telefoniya, internet, kabel televiziyası xidmətlərinin ödənişi üçün nəzərdə tutulub. Terminallar qazdan istifadəyə görə ödənişlər üçün istifadə olunan smart-kartların yüklənməsi qurğuları ilə də təchiz olunub.
Həmçinin yaxın müddətdə ödəmə terminalları vasitəsilə yol hərəkəti qaydalarının pozulmasına görə cərimələrin və bank kreditlərinin ödənilməsi xidmətindən istifadə etmək mümkün olacaq.