Azərbaycan, Bakı, 10 fevral / Trend müxbir İ.İsabalayeva/
Azərbaycan və Türkiyə arasında zəlzələlərə dair qarşılıqlı məlumat mübadiləsinin aparılması ilə bağlı razılaşma əldə olunub.
Trend-in cümə günü Azərbaycan Milli Elmlər Akademiyasının Respublika Seysmoloji Xidmət Mərkəzinin rəsmi saytına istinadən verdiyi məlumata görə, mərkəzin baş direktoru, geologiya-minerologiya elmləri doktoru Qurban Yetirmişli fevralın 6-8-də Türkiyədə NATO-nun "Cənubi Qafqazda seysmik təhlükəsizlik" layihəsi çərçivəsində keçirilən toplantıda iştirak edib.
Tədbirdə son illər Cənubi Qafqaz regionunda müşahidə olunan seysmik vəziyyət və risqlərə dair müzakirələr aparılıb.
NATO-nun "Cənubi Qafqazda seysmik təhlükəsizlik" layihəsində Azərbaycan, Gürcüstan, Türkiyə ilə yanaşı, ABŞ seysmoloqları da iştirak edirlər. Layihə çərçivəsində növbəti toplantının bu ilin ikinci yarısında Bakıda keçirilməsi nəzərdə tutulur.