Azərbaycan, Bakı, 28 yanvar /Trend/
Gəncədə avtomobillərin normal hərəkətini təmin etmək məqsədi ilə görülən işlər davam etdirilir.
Trend Kəpəz TV-yə istinadən məlumat verir ki, şəhərin Kimyaçılar küçəsi 10 metr genişləndirilərək 22 metrə çatdırılır. Bu küçə öz başlancığını şəhərin girişindən götürərək Tağı Arani küçəsinə qədər uzanır.
Aparılan işlərdən sonra uzunluğu 2 km-dən çox olan yolda avtomobillərin ikitərəfli hərəkəti təmin olunacaq. Həmçinin burada mövcud olan yüksək gərginlikli elektrik xətləri yer altına salınacaq.
Yolun genişləndirilməsi Gəncənin girişində avtomobil tıxaclarının da qarşısını alacaq.