Azərbaycan, Bakı, 3 aprel /Trend/
3 aprel 2014-cü il tarixdə Gəncədə həqiqi hərbi xidmətə çağırışla bağlı təntənəli mərasim keçirilib. Mərasimdə Gəncə şəhər İcra Hakimiyyəti başçısının birinci müavini Mikayıl Zeynalov, YAP Gəncə şəhər Təşkilatının sədri Naqif Həmzəyev, Qarabağ Müharibəsi Əlilləri, Veteranlar və Şəhid Ailələri İctimai Birliyinin Gəncə şəhər şöbəsinin sədri Almaz Aşurov, ziyalılar, ağsaqqallar, veteranlar, valideynlər və gənclər iştirak ediblər.
Öncə Azərbaycan Respublikasının Dövlət Himni səslənib.
Tədbirdə Səfərbərlik və Hərbi Xidmətə Çağırış üzrə Dövlət Xidmətinin Gəncə şəhər Kəpəz rayon Şöbəsinin rəisi, mayor Əjdər Babazadə çıxış edərək bildirib ki, bu gün Azərbaycanın öz torpaqlarını hərbi yolla azad etməyə qadir güclü ordusu var. Azərbaycanın Silahlı Qüvvələri nəinki regionun, eləcə də dünyanın ən güclü ordularından biri sayılır. Ölkə başçısının tapşırığına uyğun olaraq, bütün sahələrdə olduğu kimi, ordumuzda da son elmi-texniki yeniliklər tətbiq edilir. Hərbi mütəxəssislərin hazırlanmasına, ordu quruculuğunun inkişaf etdirilməsinə, gənclərə xüsusi diqqət və qayğı göstərdiyinə görə qədim Gəncənin gəncləri adından Azərbaycan Respublikasının Prezidenti cənab İlham Əliyevə dərin minnətdarlığımı bildirir və gənclərə uğurlar arzulayıram.
Çıxış edən Gəncə şəhər İcra Hakimiyyəti başçısının birinci müavini Mikayıl Zeynalov, YAP Gəncə şəhər Təşkilatının sədri Naqif Həmzəyev, Kəpəz və Nizami rayon Veteranlar şuralarının sədrləri Yusif Məmmədov, Tofiq Hüseynov, SSRİ Silahlı Qüvvələrinin veteranı Kərəm Həsənov ordu sıralarına yola düşən bütün gənclərimizin onlara göstərilən diqqət və qayğını layiqincə doğruldacaqlarına, Vətənimizə şərəflə xidmət edəcəklərinə, şanlı ənənələrimizi sədaqətlə yaşadacaqlarına inandıqlarını qeyd edib və müvəffəqiyyətlər arzulayıblar.
"Bu gün ordu sıralarına xidmətə yollandığım üçün özümü xoşbəxt sayıram və Vətənə sədaqətlə xidmət edərək, doğma yurduna alnıaçıq qayıdacağıma söz verirəm."-bu sözləri gənclər adından Fərid Vəliyev deyib.
Qeyd edək ki, Gəncə şəhər Kəpəz rayonundan 40 nəfərdən çox hərbi xidmətə yola salınan gənclər Fövqəladə Hallar, Daxili Qoşunlar və Sərhəd Qoşunları hissələrində xidmət edəcəklər.
***
Çağırışçılar kimi valideynlər də bir qədər həyəcanlı görünürlər. Buna baxmayaraq onlar övladlarının düşmən tapdağı altında olan torpaqlarımızı azad edəcəklərinə əmin olduqlarını bildirirlər.
Qaragöz Qurbanova - valideyn: "Bu gün oğlum hərbi xidmətə gedir. Oğlu əsgərliyə gedən bütün valideynlərə göz aydınlığı verirəm. Sağ gedib salamat gəlsinlər. Arzum odur ki, oğlum nümunəvi əsgər olsun. Xalqına, millətinə layiqli xidmət eləsin".
Bahar Əsədova - valideyn: "Gözümün ağı qarası olan bir oğul balamı yola salıram. Mən fəxr edirəm, qürur hissi duyuram ki, mənim oğlum Azərbaycanın ordu sıralarında xidmət edəcək".
Fərid Vəliyev - çağırışçı: "Bu gün mən sevinirəm ki, Azərbaycan respublikasına xidmətə gedirəm. Öz Vətənimi layiqincə qoruyacağıma söz verirəm".
Mehbarə Həsənova - valideyn: "Fəxr edirəm ki, mənim də oğlum hərbi xidmətə gedəcək, Vətənə olan borcunu yerinə yetirib geri qayıdacaq. Başda oğlum olmaqla bütün əsgərlərə üzü ağ, başı uca evlərinə qayıtmalarını arzu edirəm"
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
.jpg)
.jpg)
