Azərbaycan, Bakı, 10 mart /Trend/
Azərbaycan Respublikası Əmək və Əhalinin Sosial Müdafiəsi Nazirliyinin (ƏƏSMN) Tibbi-Sosial Ekspert Komissiyalarında (TSEK) əhaliyə xidmət şəraitinin müasir tələblərə uyğun qurulması istiqamətində işlər davam etdirilir.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən Trend-ə daxil olan məlumata görə, ƏƏSMN tərəfindən Xaçmaz rayonu üzrə 15 saylı TSEK də yeni iş şəraiti və müasir avadanlıqlarla təmin olunub.
Yeni inzibati binanın istifadəyə verilməsi zamanı əmək və əhalinin sosial müdafiəsi nazirinin müavini Natiq Məmmədov bildirib ki, ölkəmizin bütün regionlarındakı TSEK-lərin maddi-texniki bazasının yaxşılaşdırılması, eləcə də əlillik müayinələrinin müasir tibbi avadanlıqlar vasitəsilə aparılmasının təşkili nazirliyin diqqətindədir.
Ötən ilin ortalarından bu istiqamətdə mühüm işlər görülür. Artıq ƏƏSMN-nin 38 region üzrə TSEK-lərindən 19-u müasir iş şəraitinə malikdir. Bu işlər sürətlə aparılır və yaxın vaxtlarda digər TSEK-lərin də müasir iş şəraiti ilə təminatı həyata keçiriləcək.
Qeyd olunub ki, bu işlərdə əsas məqsəd vətəndaşların TSEK-lər tərəfindən normal iş şəraitində qəbul edilməsi, onların keyfiyyətli xidmətlə təmin olunmasıdır. Eyni zamanda, bu komissiyalar nazirliyin eyni region üzrə digər yerli qurumları bir binalarda yerləşdirilir. Bu da əhaliyə sosial təminat növləri, məşğulluğun təminatı, əmək hüquqlarının müdafiəsi, eləcə də tibbi-sosial ekspertiza ilə bağlı vahid məkandan xidmətlərin göstərilməsinə, bu qurumların öz fəaliyyətlərini bir-biri əlaqəli şəkildə və daha səmərəli həyata keçirməyə imkan verir. Tədbirdə son vaxtlarda tibbi-sosial ekspertiza sahəsində şəffaflığın təmin olunması üçün bu sahəyə nəzarətin artırılmasının əlilliyi olan şəxslər arasında tam və hissəvi reabilitasiya göstəricilərinin yüksəlməsinə səbəb olduğu da qeyd olunaraq, əlillik müayinəsi sisteminin avtomatlaşdırılması məqsədilə görülən işlərdən bəhs olunub. Bildirilib ki, nazirliyin Mərkəzləşdirilmiş İnformasiya Sistemində tibbi-sosial ekspertiza və reabilitasiya alt-sisteminin tətbiqi nəticəsində əlillik müayinəsi üçün müvafiq qurumlar arasında elektron məlumat mübadiləsini təmin edilməsi əlillik təyinatlarının şəffaf şəkildə aparılmasına şərait yaradıb.
Tədbir iştirakçıları TSEK əməkdaşlarının fəaliyyəti, həmçinin vətəndaşlara tibbi-sosial ekspertiza xidmətinin göstərilməsi, əlillik müayinələrinin aparılması üçün yaradılmış şəraitlə tanış olublar. Komissiyanın əməkdaşlarına əhaliyə xidmətin yüksək səviyyədə və şəffaflıq prinsipləri əsasında təşkili, əlilliyi olan şəxslərin reabilitasiya potensialının müəyyən olunması üçün nazirliyin bərpa-müalicə mərkəzləri ilə əlaqəli fəaliyyətin gücləndirilməsi və s. barədə tapşırıqlar verilib.
