...

Ekologiya Nazirliyi BP şirkətinə qarşı iddia qaldırdı

Cəmiyyət Materials 19 Mart 2015 16:57 (UTC +04:00)
Ekologiya və Təbii Sərvətlər Nazirliyi (ETSN) BP şirkətinə qarşı 12 300 manat məbləğində iddia qaldırılıb.
Ekologiya Nazirliyi BP şirkətinə qarşı iddia qaldırdı

Azərbaycan, Bakı, 19 mart /Trend, müxbir İlhamə İsabalayeva/

Ekologiya və Təbii Sərvətlər Nazirliyi (ETSN) BP şirkətinə qarşı 12 300 manat məbləğində iddia qaldırılıb.

Ekologiya və Təbii Sərvətlər Nazirliyindən Trend-ə verilən məlumata görə, 2015-ci il 5 mart tarixində Xəzər dənizində "İstiqlal" Üzən Dəniz Qazma Qurğusundan "Ultradril" su əsaslı qazma məhlulunun quyunun qazılması zamanı dənizə axıdılması faktı ilə əlaqədar operativ qaydada ekspedisiya təşkil edilib və hadisə yerində araşdırma aparılıb.

Araşdırma zamanı müəyyən edilib ki, qazma prosesində texnoloji prosesin tərkib hissəsi olan boru kəmərinin quyuya endirilməsi zamanı texnoloji reqlament normalarının pozulması nəticəsində su əsaslı qazma məhlulu 530 metr dərinlikdə dənizin dibinə dağılıb. Nazirliyin əməkdaşları tərəfindən məhlul axıdılan yerdən və axıdılma mənbəyinin ətrafından nümunələr götürülmüş, ekotoksikoloji və analitik təhlillər aparılmışdır. Təhlillərin nəticəsinə görə dənizin neft və digər toksiki maddələrlə çirklənməsi aşkarlanmamış, lakin qazma məhlulunun tərkibində aşağı toksikliyə malik maddələrin olduğu müəyyən olunmuşdur. Faktla əlaqədar BP şirkətinə qarşı 12300 manat məbləğində iddia qaldırılıb.

Məlumat üçün bildiririk ki, hələ 2000-ci illərin əvvəllərindən Ekologiya və Təbii Sərvətlər Nazirliyi BP-yə və Azərbaycanda qazma işləri aparan digər təşkilatlara sintetik əsaslı orta və yüksək toksikliyə malik kimyəvi tərkibli qazma məhlullarından dəniz şəraitində istifadəni qadağan edib və əvəzində su tərkibli məhlulların istifadəsinə icazə verib. BP-yə məxsus sözügedən bu qazma qurğusunda da su tərkibli qazma məhlulundan istifadə edilir.

ETSN-in Xəzər Kompleks Ekoloji Monitorinq İdarəsi Xəzər dənizində fəaliyyət göstərən karbohidrogen hasilatı ilə məşğul olan obyektlərdə mütəmadi olaraq monitorinq işlərini davam etdirir.

Məqalədə:
Xəbər lenti

Xəbər lenti