...

Azərbaycan və Belarus gənclər siyasəti sahəsində birgə tədbirlər planı imzalayıb (FOTO)

Cəmiyyət Materials 17 Aprel 2018 20:29 (UTC +04:00)
Nazir müavini MDB-yə üzv ölkələrin Gənclərlə İş üzrə Şurasının növbəti iclasında iştirak edib.
Azərbaycan və Belarus gənclər siyasəti sahəsində birgə tədbirlər planı imzalayıb (FOTO)

Bakı. Trend:

Belarusun paytaxtı Minsk şəhərində MDB-yə üzv ölkələrin Gənclərlə İş üzrə Şurasının növbəti iclası keçirilib.

Gənclər və İdman Nazirliyindən Trend-ə verilən məlumata görə, Azərbaycanı iclasda nazir müavini İntiqam Babayevin rəhbərliyi ilə nümayəndə heyəti təmsil edib.

İclasda Belarusun təhsil naziri İqor Karpenko giriş sözü ilə çıxış edərək, Belarusda həyata keçirilən dövlət gənclər siyasəti haqqında geniş məlumat verib. Daha sonra iclasın gündəliyinə əsasən Müstəqil Dövlətlər Birliyinin 2020-ci ilə qədərki müddətdə Beynəlxalq Gənclər Əməkdaşlığı Strategiyasının 2018-2020-ci illər üçün Tədbirlər Planının icrasının gedişatı və 2021-2030-cu illər üçün Tədbirlər Planının layihəsinin hazırlanması, "MDB üçün 100 ideya!" Beynəlxalq gənclər layihəsinin nəticələri, MDB məkanında könüllülük hərəkatının inkişafı və digər məsələlər ətrafında müzakirələr aparılmış, müvafiq qərarlar qəbul edilib. İ.Babayev çıxış edərək MDB çərçivəsində beynəlxalq gənclər əməkdaşlığı sahəsində Azərbaycanda görülmüş işlər və gələcəkdə keçirilməsi nəzərdə tutulan tədbirlər haqqında geniş məlumat verib.

Şuranın iclası ilə yanaşı Minsk şəhərində "MDB üçün 100 ideya!" Beynəlxalq gənclər layihəsinin final mərhələsi və sərgisi keçirilib.

Layihənin keçirilməsində məqsəd – gənclərin intellektual və yaradıcılıq potensialının reallaşdırılmasına şərait yaratmaq, MDB üzrə istedadlı gənclər arasında əlaqələrin inkişafını dəstəkləmək idi.

Tədbirdə Azərbaycan, Rusiya, Belarus, Türkmənistan, Qazaxıstan, Tacikistan, Ermənistan və Qırğızıstandan olan gənc alimlərin elmi işləri nümayiş olunub. Azərbaycan nümayəndə heyətində təmsil olunan gənc alimlər layihədə bir neçə nominasiya üzrə iştirak ediblər.

İştirakçılarımızın müsabiqəyə təqdim etidyi layihələr böyük marağa səbəb olub.

Bundan əlavə layihə çərçivəsində təşkil olunan sərgidə Azərbaycan geniş milli stendlə təmsil olunub. Azərbaycan ekspozisiyası sərginin ən gözəl və zəngin tərtib olunmuş pavilyonlarından biri idi. Milli sərgi çərçivəsində əcnəbi iştirakçılar və qonaqlar Azərbaycan milli şirniyyatlarına qonaq edilib, Azərbaycan xalçaları, milli musiqi alətləri, milli geyimlərimizin nümunələri ilə tanış olmaq imkanı əldə ediblər.

Tədbir çərçivəsində Belarusun Baş nazirinin müavini Vasili Jarkonun və Belarus təhsil naziri İqor Karpenkonun iştirakı ilə İ.Babayev və Belarus Respublikası təhsil nazirinin müavini Raisa Sidorenko tərəfindən “Azərbaycan Respublikası Gənclər və İdman Nazirliyi və Belarus Respublikası Təhsil Nazirliyi arasında 2018-2019-cu illər üzrə dövlət gənclər siyasəti sahəsində birgə tədbirlər planı” imzalanıb.

Tədbirdə Azərbaycanın Belarusdakı səfiri Lətif Qəndilov və səfirliyin əməkdaşları yaxından iştirak edib, daha sonra L.Qəndilovun iştirakı ilə Azərbaycan nümayəndə heyəti ilə səfirlikdə görüş keçirilib.

Məqalədə:
Xəbər lenti

Xəbər lenti