Bakı. Trend:
Bakının Qaradağ rayonunda IDEA İctimai Birliyi və Qaradağ Rayon İcra Hakimiyyətinin birgə təşkilatçılığı ilə ümummilli lider Heydər Əliyevin anadan olmasının 95-ci ildönümünə həsr olunan ağacəkmə aksiyası keçirilib.
IDEA İctimai Birliyindən Trend-ə verilən məlumata görə, yerli könüllülərin iştirakı ilə keçirilən aksiya zamanı Salyan şossesinin 19-cu kilometrində yerləşən boş ərazidə 300 ədəd Eldar şamı, eləcə də çoxsaylı gül kolları əkilib.
Azərbaycanda ekologiyanın qorunması ilə bağlı ümummilli lider Heydər Əliyevin əsasını qoyduğu ənənənin davamı olaraq, bu gün ölkəmizdə ətraf mühitin daim sağlamlaşdırılması, o cümlədən mövcud yaşıllıq sahələrinin artırılması istiqamətində ardıcıl tədbirlər həyata keçirilir.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Azərbaycanda yaşıllıqların qorunması və genişləndirilməsi üzrə çoxsaylı layihələr həyata keçirilib, IDEA könüllülərinin dəstəyi ilə ölkə ərazisində 5 milyondan çox ağac əkilib və yüzlərlə qanunsuz ağac kəsintisi cəhdinin qarşısı alınıb.
