Bakı. Trend:
Keçən həftənin Şənbə günü, 12 Dekabrda Avropa Azərbaycan məktəbinin direktoru Françesko Bankini və digər məktəb heyəti Bərdə şəhərində və eləcə də müharibə zamanı ən çox zərər çəkmiş Qarayusifli kəndində 30-dan çox ailəni ziyarət etdilər.
Trend-in məlumatına görə, məktəb heyəti və valideynlər arasında toplanmış vəsaitlə müharibə zamanı yaralanmış, şəhid olmuş vətəndaşlarımızın ailələrinə istər maddi, istərsə də mənəvi yardım göstərərək, onların yanında olmağa, dərdlərinə şərik olmağa çalışdılar.
Avropa Azərbaycan məktəbinin direktoru Françesko Bankininin sözlərinə görə Dekabr ayının 18-dən başlayaraq isə Bərdə və Ağdam rayonlarında yerləşən məktəblərə təhsillə bağlı dəstək nəzərdə tutulur.
Avropa Azərbaycan məktəbinin müəllimləri könüllü olaraq, burada yerləşən məktəb şagirdlərinə dərslər keçəcək, həmçinin, buradakı müəllimlərlə birlikdə işləyib peşəkar inkişafı təmin etməyə
və təhsil strategiyalarını bölüşməyə çalışacaqlar.
Avropa Azərbaycan məktəbinin Bərdə və Ağdam rayonlarında təhsilə dəstək kampaniyası Təhsil Nazirliyi ilə birgə həyata keçiriləcək.
Mövcud şəraitlə bağlı dərslər müvəqqəti olaraq onlayn keçiriləcəkdir.
