Bakı. Trend:
Azərbaycan Respublikasının Prezidenti İlham Əliyev və birinci xanım Mehriban Əliyeva "Nizami Gəncəvi" adına mədəniyyət və istirahət parkında əsaslı təmir və yenidənqurmadan sonra yaradılan şəraitlə tanış olublar.
Trend xəbər verir ki, Bakının Xətai rayonunda 11,2 hektar ərazisi olan parkda paytaxt sakinlərinin və şəhərimizin qonaqlarının səmərəli istirahəti üçün hər cür şərait yaradılıb.
Mövcud park və xiyabanların yenidən qurulması və yenilərinin salınması Bakının müasir görünüşünə və ekoloji vəziyyətinə müsbət təsir edən əsas amillərdəndir. "Nizami İli"nin sonunda dahi mütəfəkkirin adını daşıyan parkın yenidənqurmadan sonra istifadəyə verilməsi həm də rəmzi olaraq xüsusi məna kəsb edir.
Bir vaxtlar "Luna Park" adı ilə məşhur olan ərazi uzun illər baxımsız qalmışdı. Ətraf ərazilərdə yaşayan sakinlərin sevimli istirahət məkanı olan parkda əsaslı yenidənqurmaya zərurət yaranmışdı. Bu məsələ Prezident İlham Əliyevin 2021-ci il 19 aprel tarixli Sərəncamı ilə həllini tapdı.
Qeyd edək ki, 1922-ci ildə salınmış parkın şəhərin estetik görünüşünə uyğunlaşdırılması məqsədilə onun ərazisində yerləşən bir və iki mərtəbəli inzibati binalarda əsaslı təmir və yenidənqurma işləri həyata keçirilib, süni göl yaradılıb, amfiteatr və 1938-ci ildən mövcud olan yay kinoteatrı yenidən qurulub, iki fəvvarə kompleksi və müasir tipli işıqlandırma sistemi yaradılıb. Parkda müasir söhbətgahlar, müxtəlif ölçülü oturacaqlar, idman qurğuları quraşdırılıb, uşaq əyləncə kompleksi yaradılıb. Yay kinoteatrının qarşısında çay daşlarından qədim tipli yeni qala divarı tikilib. Parkın ərazisində yaşıllaşdırma işləri görülüb, minlərlə ağac-kol və dekorativ bəzək bitkiləri əkilib.
Yeni açılan parkla bağlı vətəndaşlar fikirlərini Trend-ə bölüşüblər.
Paytaxt sakini Rzayeva Sayad deyir ki, bizim tərəfdə əvvəllər istirahət etmək üçün park yox idi: "Nizami Gəncəvi" adına parkın açılması məni çox sevindirir. Bakıda salınan qeyri-adi parklardan biridir. Böyüklərin və uşaqların istirahət etməsi və əylənməsi üçün hər cür şərait yaradılıb. Bir vətəndaş olaraq başda cənab Prezident İlham Əliyevə və bu parkın salınmasında əməyi keçən hər kəsə öz təşəkkürümü bildirirəm".
Qəsəbə sakini Əliyev Fəxrəddin isə bildirib ki, parkın əvvəlki vəziyyəti bərbad idi: "Bu gün açlışdan sonra nəvəmi də götürüb parka istirahət etməyə gəldim. Parka gələndə gözlərimə inana bilmədim. Əvvəlki parkdan heç bir əlamət qalmamışdı. Butün əməyi keçənlərə öz dərin təşəkkürümü bildirirəm".
Digər qəsəbə sakini Sayalı xanım isə sevincinin həddi-hüdudunun olmadığını bildirdi.
"Həmişə fikirləşirdim ki, yaxınlıqda park olardı, nəvələrimlə gedib istirahət edərdim. Cənab Prezident İlham Əliyevə dərin minnətdarlığımı bildirirəm ki, hər zaman vətəndaşların rifahını düşünür", - deyə o qeyd edib.
