Bakı. Trend:
Son zamanlar qadın dini ayin icraçılarının təyinatında məqsəd yas mərasimlərində xurafat, falçılıq kimi zərərli vərdişləri deyil, əsl dini təbliğ etmələridir.
Trend xəbər verir ki, bunu bu gün "Media və dini təhlükəsizlik" mövzusunda keçirilən konfransda Dini Qurumlarla İş üzrə Dövlət Komitəsinin sədri Mübariz Qurbanlı bildirib.
Komitə sədri bildirib ki, bəzən yas mərasimlərində təyinatı olmayan şəxslər məclis idarə edir: "Əslində, yas məclislərini idarə edən şəxs təhsilli adam olmalıdır, amma vətəndaşa hökm etmək olmaz ki, kimisə dəvət et. Bu məsələdə vətəndaşın öz seçimi var. Ona görə müəyyən problemlər var. Bəzən buna görə Komitəni və Qafqaz Müsəlmanları İdarəsini yersiz tənqid edirlər. Nəzərə almaq lazımdır ki, Azərbaycanın 10 milyondan çox əhalisi var. Kim yasa kimi dəvət edir, bunun hamısını tənzimləyə bilmirik. Komitənin cəmi 179 əməkdaşı var. Biz strategiya ilə məşğuluq.
Təhsili olmayan şəxs dini ayin icra etməməlidir. Bu məsələ məscidlərdə həll olunub. Amma məsciddənkənar proseslərdə ictimaiyyəti inandırmalıyıq ki, təhsili olmayan adamı bu cür məclislərə dəvət etmək olmaz".