Laçın. Trend:
Həyatın yenidən canlandığı Laçın şəhərində artıq bayramlar və əlamətdar günlər əsl sahiblərinin iştirakı ilə qeyd edilir. Bu il də Laçında "Dünya Azərbaycanlılarının Həmrəyliyi Günü" və "Yeni İl" bayramları ilə əlaqədar silsilə tədbirlər keçirilib.
Trend-in bölgə müxbiri xəbər verir ki, Laçın rayonunda Azərbaycan Respublikası Prezidentinin Xüsusi Nümayəndəliyinin təşəbbüsü, “Bakı Abadlıq Xidməti” MMC-nin dəstəyi, Laçın rayonunda Bərpa, Tikinti və İdarəetmə Xidmətinin, “Laçın Abadlıq Xidməti” ASC-nin və “Hoçazfilm” yaradıcılıq studiyasının təşkilatçılığı ilə gerçəkləşib.
Tədbirlər proqramına əsasən öncə Laçının balaca sakinləri üçün Seyrəngahda bayram şənliyi təşkil edilib. Şaxta baba və qarqız uşaqların sevincinə sevinc qatıb. Həmçinin balacalar üçün kreativ oyunlar, master klaslar face-art təşkil edilib. Bayram şənliyinə gələn maskat kuklalar uşaqları daha da sevindirib. Bayram tədbirləri günün ikinci yarısında Həkəri çayı sahilində davam etdirilib. Öncə Azərbaycanın ərazi bütövlüyü uğrunda canından keçən şəhidlərin və dekabrın 25-də Bakı-Qroznı reysini yerinə yetirən “Embraer 190” tipli sərnişin təyyarəsinin qəzaya uğraması nəticəsində həlak olanların əziz xatirəsi bir dəqiqəlik sükutla yad edildikdən sonra Dövlət Himni səsləndirilib.
Çıxışlar zamanı bildirilib ki, Müzəffər Ali Baş Komandan İlham Əliyevin rəhbərliyi və qüdrətli Azərbaycan Ordusunun gücü sayəsində Laçın öz azadlığına qovuşub. Laçında görülən quruculuq işləri nəticəsində qısa müddətdə şəhərdə həyat öz axarına qayıdıb. Laçında əhalinin məşğulluğu üçün yaradılan iş yerlərindən danışılıb. Həmçinin qeyd edilib ki, əsası Ulu Öndər Heydər Əliyev tərəfindən qoyulmuş Dünya Azərbaycanlılarının Həmrəylik Günü hər il azərbaycanlılar tərəfindən təntənəli qeyd olunur.
Ümummilli Lider Heydər Əliyev xalqımız arasında birlik və həmrəylik ruhunun gücləndirilməsi zərurətini nəzərə alaraq, 1991-ci ilin dekabrın 16-da “Dünya Azərbaycanlılarının Həmrəylik və Birlik Günü haqqında” qərarın qəbul edilməsinə nail olub. Həmin vaxtdan başlayaraq müxtəlif ölkələrdə yaşayan soydaşlarımız hər il dekabrın 31-ni Dünya Azərbaycanlılarının Həmrəylik Günü kimi qeyd edir.
Tədbirin tərkib hissəsi olan "Can Laçın qış möcüzəsi" yarmarkası nümayiş olunub. Yarmarkada laçınlı xanımların və uşaqların hazırladığı əl işləri, arıçılıq məhsulları, kənd təsərrüfatı məhsulları milli mətbəximizin nümunələri yer alıb. Yarmarkaya baxış keçirilib, sərgilənən məhsullar haqqında ətraflı məlumat verilib. Daha sonra "Ay Laçın" adlı yeni il konserti ilə tədbir davam edib. Konsert proqramında məhşur müğənnilərin ifaları yer alıb.
