Bakı. Trend:
Prezident İlham Əliyevin dekabrın 25-də Aktau yaxınlığında AZAL-a məxsus sərnişin təyyarəsinin qəzaya uğraması ilə bağlı Azərbaycan televiziyasına verdiyi müsahibə xarici mətbuatda geniş işıqlandırılır.
Trend xəbər verir ki, Fransanın “La Gazette du Caucase” nəşri xüsusilə Azərbaycan dövlət başçısının baş vermiş qəzanın reallıqdan uzaq versiyalarını yaymaq cəhdləri ilə bağlı prinsipial mövqe göstərdiyini qeyd edib.
"Prezident Əliyev təyyarənin quşlarla toqquşması ehtimalını rədd edib, çünki füzelyajın dəlik-deşik olması bu versiyanı şübhə altına alır. Azərbaycan lideri vurğulayıb ki, Rusiyanın rəsmi mənbələri qaz balonunun partlaması versiyasını irəli sürüblər və bu, Əliyevin fikrincə, faciənin əsl səbəblərini gizlətmək cəhdidir. Azərbaycanın Rusiya qarşısında tələbləri sadə və ciddidir: üzr istəmə, günahın etirafı, günahkarların cəzalandırılması və zərərçəkənlərə təzminat ödənilməsi", - nəşr qeyd edir.
İsveçrənin Aze.swiss portalı öz növbəsində, hadisədən dərhal sonra Azərbaycanın gördüyü tədbirlərə diqqət çəkir. Nəşr qeyd edir ki, Prezident İlham Əliyev baş vermiş faciəyə operativ reaksiya verib. Materialda faciənin baş vermə şəraitinin müəyyən edilməsi üçün görülən tədbirlər, o cümlədən bir qrup azərbaycanlı həkimlərin Qazaxıstana göndərilməsi və cinayət işinin başlanması barədə ətraflı məlumat verilir. Azərbaycan Prezidentinin təyyarənin kənardan zədələnməsi, eləcə də radioelektron mübarizə vasitələrinin mümkün təsirləri barədə bəyanatına mühim diqqət yetirilir.
Türkiyənin “DHA Press” nəşri isə öz materialında hadisənin araşdırılmasının beynəlxalq aspektlərinə diqqət çəkir. Məqalədə vurğulanır ki, Prezident İlham Əliyev xilasetmə əməliyyatlarında göstərdiyi dəstəyə və köməyə görə Qazaxıstana minnətdarlığını bildirib.
“Azərbaycan Prezidenti hava nəqliyyatının təhlükəsizliyinin vacibliyini qeyd edərək bildirib ki, Bakı ilə Rusiyanın bir sıra şəhərləri arasında uçuşların dayandırılmasına şəxsən göstəriş verib”, - DHA Press yazır.
