Bakı. Trend:
Böyük Britaniyanın paytaxtı Londonda malikanəyə girən oğru ümumilikdə 10,4 milyon funt sterlinq (təxminən 13 milyon dollar) dəyərində zinət əşyalarını oğurlayıb.
Trend xəbər verir ki, bu barədə "Mirror" qəzeti London polisinə istinadən məlumat yayıb.
Məlumata görə, cinayətkar tək hərəkət edib. O, ev sahiblərinin malikanədə olmadığı vaxt zümrüdlü qızıl bilərzik, brilyant və sapfirli üzüklər, brilyant sırğalar, habelə brilyant, sapfir, qızıl və platindən hazırlanmış boyunbağılar oğurlayıb. Bundan əlavə, oğru 150 min funt sterlinq (təxminən 188 min dollar) dəyərində "Hermes" çantasını da ələ keçirib.
Zərərçəkənlər oğrunun tapılmasına kömək edə biləcək hər kəsə yarım milyon funt sterlinq (627 min dollar) və tapılan hər bir əşyanın dəyərinin 10 faizini mükafat olaraq təklif edirlər.