Reklam fəaliyyəti ilə bağlı "Televiziya və radio yayımı haqqında" Qanunun tələblərini davamlı şəkildə pozduqlarına görə "ANS", "Azad Azərbaycan", "Lider" və "Space" televiziya şirkətlərinə xəbərdarlıq elan olunub. Bu barədə Trend ə Milli Televiziya və Radio Şurasından məlumat verilib.
Qeyd edək ki, Milli Televiziya və Radio Şurasının iclası keçirilib, son bir ay ərzində Şuranın telekanalların reklam fəaliyyəti ilə bağlı apardığı monitorinqi müzakirə edilib. Monitorinqin nəticələrinə əsasən dörd özəl telekanalın reklam fəaliyyəti ilə bağlı "Televiziya və Radio yayımı haqqındam Qanunun 35.4, 35.5, 35.6, 35.8 və 36.5-ci maddələrinin tələblərini davamlı surətdə pozduqları müəyyən edilib. Buna görə də Şura iclasının qərarı ilə həmin telekanallara ilkin cəza tədbiri kimi xəbərdarlıq elan olunub.
İclasda həmçinin "SKY" Məhdud Məsuliyyətli Cəmiyyətyə kabel televiziyası şəbəkəsinin yaradılması və istismarı üçün xüsusi razılıq (lisenziya) verilməsi barədə qərar qəbul olunub. Lisenziya almaq üçün tələb olunan sənədlər paketinin müəyyən olunmuş müddətədək Milli Teleradio Şurasına təqdim etmədiklərinə görə, "Qütb", "Xəyal" və "Xaçmaz" televiziyalarına da xəbərdarlıq elan edilib.
