Siyasi Məhbus Problemləri üzrə Şura "siyasi məhbus" hesab olunan bir sıra məhkumların müraciətləri əsasında onların istintaq və məhkəmə sənədlərini araşdırır. Trend in məlumatına görə, bu barədə "Siyasi Məhbus Problemləri üzrə Şura" İctimai Birliyinin yığıncağında açıqlama verilib. 60-a yaxın Qeyri Hökumət Təşkilatının təmsilçisinin iştirak etdiyi toplantıda 2005-ci ildə birliyin həyata keçirdiyi tədbirlər haqqında məlumat verilib. Şuranın sədri Ənvər Qafarlı Avropa Şurası ilə əməkdaşlığın yüksək nəticələr verdiyini bildirərək bu istiqamətdə tədbirlərin davam etdiriləcəyini vurğulayıb.
Ə.Qafarlı qeyd edib ki, Siyasi Məhbus Problemləri üzrə Şura "siyasi məhbus" adlandırılan şəxslərin işlərini də obyektiv araşdırmağa başlayıb. Onun sözlərinə görə, Şuranın ekspertləri bir sıra məhkumların müraciətləri əsasında onların da istintaq və məhkəmə sənədlərini araşdırırlar: "Həmçinin Avropa Şurasına "siyasi məhbus" kimi təqdim olunan dustaqların istintaq və məhkəmə işləri ilə bağlı qəbul olunmuş Bakı Bəyannaməsində "siyasi məhbus" kriteriyaları elmi və hüquqi cəhətdən daha da təkmilləşdirilib. Siyasi Məhbus Problemləri üzrə Şuranın hazırladığı yekun sənədlər Avropa Şurası Parlament Assambleyasının ötən ilin aprel və iyun aylarındakı sessiyalarında parlamentarilərə və Avropa Şurasının komitələrinə çatdırılıb və keçirilən görüşlər zamanı "Bakı sənədləri"nə beynəlxalq ekspetlər tərəfindən iradlar tutulmayıb"-deyə məruzəçi bildirib.
İclasda Şura üzvləri bir sıra məsələlər barəsində müzakirələr aparmış və birliyə yeni üzvləri qəbul ediblər.