Afina Olimpiadasının boks üzrə bürünc mükafatçısı, avtomobil qəzasından sonra bərpa prosesi keçən Ağası Məmmədov iyulda keçiriləcək Avropa çempionatında çıxış edə bilər.
Yığmanın baş məşqçisi Məmməd Eyvazov Trend ə bildirib ki, 2003-cü ilin dünya çempionu qitə birinciliyinə namizəd kimi nəzərdən keçirilir. "Hazırda Ağası fiziki baxımdan qüvvəsini artırır və tezliklə sparrinqə başlayacaq. Həkimlər rinqə çıxması üçün ona xeyir-dua veriblər, buna görə də o, əsas yerlər uğrunda mübarizəyə tamamilə qoşula bilər" - deyə M.Eyvazov bildirib.
Məşqçinin sözlərinə görə, A.Məmmədov hələ yoxlama sparrinqlərdən keçməlidir, bundan sonra isə yığmanın tərkibi müəyyən ediləcək.