Üç cəzaçəkmə müəssisəsi qəbul olunmuş beynəlxalq standartlara cavab vermir. Bu, 12, 5 №-li müəssisələr və Qobustan qapalı həbsxanasıdır. Bu barədə ədliyyə nazirinin müavini Nazim Ələkbərov xəbər verib. Onun sözlərinə görə, bir vaxtlar 5 və 12 saylı koloniyadan olan məhkumlar qaçmağa cəhd ediblər. Onlardan biri hətta buna nail olmuşdu, lakin 24 saat ərzində məhkum tutulub geri qaytarılıb.
Hazırda bu azadlıqdan məhrumetmə müəssisələrinin heç birində koloniya rəisi yoxdur. Onlar işdə səhlənkarlığa yol verdiklərinə görə vəzifəsindən azad ediliblər. Qobustan qapalı həbsxanasının rəisi Sədaqət Ağayev də bu səbəbdən vəzifəsindən kənarlaşdırılıb. İşdən çıxarılmazdan əvvəl 4 ay ərzində rəhbərlik ona həbsxanada kardinal dəyişikliklər aparmaq tapşırığı verib. S. Ağayev isə bu məsuliyyətin öhdəsindən gələ bilməyib.
