Gələn ilin ilk ayında Dünya Azərbaycanlıları Konqresinin (DAK) Rusiyanın Sankt-Peterburq şəhərində nümayəndəliyinin açılışı olacaq. Bu barədə Trend ə DAK-ın sədri Cavad Derəxti məlumat verib.
O bildirib ki, DAK-ın Sankt-Perebrqda nümayəndəliyi yaradılır. Yanvar ayında nümayəndəliyin açılışı olacaq və C.Derəxti özü də bu mərasimdə iştirak edəcək.
Gələn ilki fəaliyyət istiqamətlərindən danışarkən C.Derəxti bildirib ki, DAK 2007-ci ili "Xocalı ili" elan edib. Təşkilat Xocalı soyqırımı ilə bağlı müxtəlif ölkələrdə tədbirlər təşkil edəcək, erməni vəhşiliyinin dünyaya çatdırılması istiqamətində təbliğati işlər həyata keçirəcək. DAK-ın həmçinin yanvar ayında "20 Yanvar" faciəsinin növbəti ildönümü münasibəti ilə də tədbiri olacaq: "DAK-ın ayrı-ayrı ölkələrdəki nümayəndəlikləri Dünya Azərbaycanlılarının Həmrəylik gününü öz yaşadıqları ölkələrdə qeyd edəcəklər. DAK-ın Qarabağın işğalı ilə bağlı bir sıra tədbirləri keçiriləcək. Fevral ayında bizim növbəti tədbirimiz Almaniyada olacaq, bu ölkədəki Azərbaycan, türk diasporu ilə birgə toplantı təşkil edəcəyik. Mart ayında isə Azərbaycan-türk diasporlarının Bakıda keçiriləcək Forumunda iştirak edəcəyik"-deyə DAK sədri məlumat verib.
C.Derəxti əlavə edib ki, Amerikaya səfər edəcək və orada bir sıra mühüm görüşlər keçirəcək. DAK rəhbərliyi ABŞ-ın yeni seçilmiş Konqres, Senat üzvləri ilə gələn ilin ilk rübündə görüşlər keçirməyi planlaşdırır.