Rusiyada yaşayan Gürcüstan vətəndaşlarının sürətlə geriyə qayıtması prosesi davam edir. Bu barədə Trend ə Gürcüstanda fəaliyyət göstərən "Qeyrət" Xalq Hərəkatının həmtəsisçisi Zümrüd Qurbanov məlumat verib.
O bildirib ki, Gürcüstanda sırf azərbaycanlılar yaşayan 167 kənd var, bundan başqa çoxlu sayda kəndlərdə, məntəqələrdə azərbaycanlılar yaşayır. Hər bir kənddən müəyyən sayda azərbaycanlılar vaxtilə Rusiyaya işləməyə gediblər. Rusiyada miqrasiya ilə bağlı yeni qanun çıxarılandan sonra bu ölkədə yaşayan Gürcüstan azərbaycanlılarının çoxu qayıtmağa məcburdurlar. Z.Qurbanovun sözlərinə görə, Rusiyada hansısa işlə məşğul olan soydaşlarımızın əksəriyyətinin sənədləri qaydasında olsa da, özləri ilə apardıqları ailə üzvlərinin sənədləri qaydasında deyil. Onlardan başqa ölkələrə köçənlər də var. Başqa ölkələrdə yerləşə bilməyənlər mütləq ya Azərbaycan, ya da Türkiyə vasitəsilə Gürcüstana qayıdırlar.
"Rusiya və Gürcüstanın ikitərfəli siyasəti azərbaycanlaların yaşayışına, maddi durumuna, uşaqların gələcək taleyinə birbaşa təsir göstərən amilə çevrilib. Rusiyadan Gürcüstana qayıtmış vətəndaşların sosial vəziyyəti, işlə təmin olunması, uşaqların təhsillərini davam etdirməsi ciddi problem olaraq qalır. Rusiyada təhsil alan azərbaycanlı uşaqlar Gürcüstana qayıtdıqdan sonra öz kəndlərində təhsil alması çətinləşir, çünki yerli əlifbaları bilmirlər. Həmçinin rus məktəbləri Marneulidə, Tbilisidədir, uzaq məsafəyə görə rus dilində təhsil almış uşaqların bu məktəblərə getməsi problemə çevrilib" - deyə Z.Qurbanov qeyd edib.
