Rusiyada miqrasiya haqqında yeni qanunun qüvvəyə minməsindən sonra bu ölkədə yaşayan azərbaycanlılarla bağlı ciddi problemlər qeydə alınmayıb. Bu barədə Trend ə Xarici Ölkələrdə Yaşayan Azərbaycanlılarla İş üzrə Dövlət Komitəsinin Rusiya üzrə şöbə müdiri Şakir Səlimov məlumat verib.
Azərbaycanlıların problemləri ilə bağlı Dövlət Komitəsində yaradılmış qərargahın rəhbəri Ş.Səlimov qeyd edib ki, Rusiyada qeyri-leqal yaşayan soydaşlarımızın deportasiya olunması faktları yoxdur: "Hələki problemli vəziyyət qeydə alınmayıb. Soydaşlarımızın vəziyyətini yerində araşdırmaq üçün Dövlət Komitəsinin əməkdaşı Rusiyaya ezam olunub. Rusiya ərazisində yaradılmış qərargahlarla mütəmadi şəkildə əlaqə saxlayır, mövcud durumu nəzarətdə saxlayırıq".
Ş.Səlimov deyib ki, qərargahlara müraciət edən azərbaycanlıların əsasən sənədləri qaydasında deyil və onlar qeydiyyata düşmək üçün hansı orqanlara müraciət edilməsini bilmirlər. Qərargahlarda soydaşlarımıza lazım olan hüquqi yardımlar göstərilir.