Azərbaycan, Bakı / Trend müxbir K Zərbalıyeva/ Ali Məhkəmənin İqtisadi Mübahisələrə Dair İşlər üzrə Məhkəmə Kollegiyasında hakim İman Nağıyevin sədrliyi ilə bu gün "Turan" İnformasiya Agentliyinin və "Azadlıq" qəzetinin kassasiya şikayəti üzrə proses təxirə salınıb. Hakim Nağıyev cümə günü bildirib ki, prosesin təxirə salınması işlə bağlı bəzi sənədlərin məhkəmə tərəfindən tələb olunması ilə əlaqədardır. Proses mayın 4-də keçiriləcək.
Dövlət Əmlakının İdarə Edilməsi üzrə Dövlət Komitəsinin (DƏİEDK) müraciəti ilə ötən ilin noyabrında İqtisad Məhkəməsi Xəqani 33 ünvanından "Azadlıq" qəzetinin Azərbaycan Xalq Cəbhəsi Partiyasının, "Turan" İnformasiya Agentliyinin, "Bizim Yol" qəzetinin və Azərbaycan Demokratiyanın İnkişafı Fondunun çıxarılması ilə bağlı qərar qəbul etmişdi. Qərardan apellyasiya şikayəti verilsə də, Apellyasiya Məhkəməsi şikayəti təmin etməyib.