Azərbaycan, Bakı / Trend müxbir S.İlhamqızı/ Türkiyənin bir sıra qeyri-hökumət təşkilatları Ermənistandakı "Metsamor" Atom Elektrik Stansiyasının bağlanmasını tələb edirlər. Bununla əlaqədar QHT-lər Türkiyənin səhiyyə naziri Rəcəb Akdağa müraciət ünvanlayıblar.
Bu barədə şənbə günü "Trendə" Türkiyənin İqdır vilayətinin bələdiyyəsindən məlumat verilib.
Müraciətdə bildirilir ki, "Metsamor" istifadəyə verilməsindən sonra 10 il ərzində 150-ə yaxın qəza keçirib və Beynəlxalq Atom Enerji Agentliyinin (MAQATE) standartlarına görə, dünyada bütün atom elektrik stansiyaları arasında təhlükəsizliyinin təminatı baxımından ən sonuncu yerdədir.
1988-ci ildə Ermənistanın Spitak bölgəsində baş verən və 25 min nəfərin ölümünə səbəb olan zəlzələdən sonra həmin il stansiya bağlanmışdı. İkinci bir zəlzələyə də davam gətirməsi mümkün olmayan bu stansiyanın fəaliyyəti 1996-ci ildə yenidən bərpa edildi. Ermənistan hökuməti ilə Avropa Birliyi arasında 1999-cu ilin iyulunda Brüsseldə "Metsamor" stansiyasının 2004-cü ilə qədər bağlanmasına dair anlaşma imzalandı. 2001-ci ildə Avropa Şurasına üzv olarkən də Ermənistan 2004-cü ilə qədər stansiyanı bağlayacağına dair öhdəlik götürmüşdü.
"Lakin bütün bunlara baxmayaraq, son illərdə stansiya fəaliyyətini daha da artırıb, hətta hazırda İran və Gürcüstana elektrik verir. Türkiyə sərhədinin 16 kilometrliyində yerləşən, qoruma bəndi olmayan, dünyanın ən köhnə texnologiyası ilə hazırlanmış "Metsamor" bütün bölgəyə, insanların həyatına, sağlamlığına təhlükəlidir. Xüsusilə də İqdır sakinləri daha çox təhlükə altındadır. Burada insanların psixikasının pozulması, bütün növ xərçəng xəstəliklərinin yaranması məhz həmin atom stansiyası ilə bağlıdır. 1988-ci ildəki zəlzələdə və sonrakı qəzalarda insanlar çoxlu zərərli radiasiyalar alıblar"-deyə müraciətdə bildirilir. QHT-lər Türkiyənin Avropa Birliyinə üzv ölkələrlə, beynəlxalq təşkilatlarla birgə "Metsamor"un tezliklə bağlanması üçün işlər görməsini tələb edirlər.