Azərbaycan, Naxçıvan / Trend müxbir İ.Nəsib/ Araz çayında suyun səviyyəsinin kəskin qalxması nəticəsində Naxçıvan Muxtar Respublikasının bəzi kəndlərində yaşayış məntəqələri və inzibati binaları su basıb. Trend in Naxçıvan üzrə müxbirinin çərşənbə axşamı verdiyi məlumata görə, Arazda suyun səviyyəsinin qalxması nəticəsində Kəngərli rayonunun Təzəkənd yaşayış məntəqəsində 10-a yaxın evi su basıb. Su basan evin sakinləri oradan köçürülüb. Bundan əlavə kənddə yerləşən sərhəd bölüyünün ərazisi suyun əhatəsində qalıb.
Təzəkənd yaşayış məntəqəsində analoji hadisə ötən il baş verib. Naxçıvan MR Fövqəladə Hallar Nazirliyinin ayırdığı maliyyə vəsaiti hesabına həmin ərazidə 20 yeni ev tikilib, 15 ev isə bərpa olunub. Eyni zamanda bəndlər tikilib.
Sakinlərin sözlərinə görə, ötən il quraşdırılan bəndlərin uçma təhlükəsi yaranıb. Artıq bəndlərdən su sızmaları baş verib.
Analoji vəziyyət Muxtar Respublikanın Şaxtaxlı kəndində də yaranıb. Kəndin İranla sərhədində fəaliyyət göstərən Azərbaycanın gömrük-keçid məntəqəsindəki körpü su altında qalıb. Nəticədə məntəqə faəliyyətini dayandırıb. Naxçıvan MR-in Gömrük Komitəsindən çərşənbə axşamı bildiriblər ki, hazırda məntəqədə təmizləmə işi aparılır və yaxın günlərdə keçid məntəqəsi fəaliyyətini bərpa edəcək.
Naxçıvan MR-in ərazisi 5,5 min kvadratkilometrdir. Ölkə ərazisinin 6,4%-ni təşkil edir. 7 inzibati rayona (Babək, Şərur, Ordubad, Sədərək, Şahbuz, Culfa və Kəngərli ) bölünüb. Əhalisi 380,2 min nəfər, paytaxtı Naxçıvan şəhəridir.