Azərbaycan, Bakı, 13 sentyabr /Trend/
FIFA U-17 qadınlararası dünya çempionatında iştirak edəcək komandaların Azərbaycana gəlişi artıq başlayıb. Ölkəmizə ilk təşrif buyuran komanda Kanada yığması olub.
Trend-in AFFA-nın rəsmi saytına istinadən verdiyi məlumata görə, mundial iştirakçısını Heydər Əliyev Beynəlxalq Hava Limanında FIFA U-17 qadınlararası dünya çempionatı Azərbaycan 2012-nin rəsmi maskotu Top Top Qız qarşılayıb.
Top Top Qızın təqdim etdiyi gül dəstələrini aldıqdan və kollektiv şəkil çəkdirdikdən sonra komandanın üzvləri qalacaqları otelə yola düşüb. Kanada yığması qonaqpərvərliklə qarşılanmalarından məmnun olduqlarını bildirib.
Qeyd edək ki, bu il sentyabrın 22-dən oktyabrın 13-dək Bakıda FIFA U-17 qadınlararası dünya çempionatı təşkil olunacaq.
Komandalar dörd qrupda mübarizə aparacaqlar:
A qrupu: Azərbaycan, Kolumbiya, Nigeriya, Kanada
B qrupu: Fransa, ABŞ, Şimali Koreya, Qambiya
C qrupu: Meksika, Yeni Zelandiya, Braziliya, Yaponiya
D qrupu: Uruqvay, Çin, Qana, Almaniya.
