Bakı. Trend:
Milli komandamızın üzvləri və təlim-məşq toplanışı üçün Bakıya digər ölkələrdən daha tez gəlmiş Qazaxıstan, Özbəkistan və Bolqarıstan komandaları batut gimnastikası və tamblinq üzrə Dünya Kubokuna hazırlıq məqsədilə Milli Gimnastika Arenasında məşqlərə start veriblər.
Azərbaycan Gimnastika Federasiyasından Trend-ə verilən məlumata görə, fevralın 11-də arenada kubokun yoxlama-məşq toplanışı keçiriləcək. Bu toplanışda Avstraliya, Yeni Zelandiya, İsveçrə və Gürcüstan komandalarının da iştirakı gözlənilir.
Xatırladaq ki, Tokio Olimpiya Oyunlarına batut gimnastikası üzrə təsnifat xarakterli Dünya Kubokunda (Bakı, 16-17 fevral) 31 ölkənin 300-ə yaxın gimnastı mübarizə aparacaq.
