Bakı. Trend:
Energetika naziri Pərviz Şahbazov Moskvada keçirilən “Rusiya Enerji Həftəsi” 6-cı Beynəlxalq Forumunda iştirak edib.
Trend xəbər verir ki, nazir Rusiya Federasiyası Baş nazirinin müavini Aleksandr Novakın da qatıldığı sessiyada turbulentlik dövründə qlobal neft -qaz bazarı və Azərbaycanın qaz təchizatında prioritetləri ilə bağlı fikirlərini bölüşüb.
Qlobal enerji arxitekturasının yenidən dizayn olunduğu müasir
reallıqlarda diversifikasiyanın əhəmiyyətinin artdığını vurğulayan
nazir deyib ki, şaxələndirmə istehlakçı ölkələr üçün mənbələrin,
enerji ölkələri üçünsə marşrutların, bazarların
müxtəlifliyidir.
Energetika naziri ölkəmizdə bütün növ enerji resurslarının
işlənilməsi və müxtəlif istiqamətlər üzrə dünya bazarlarına
çıxarılmasının hər zaman paralel həyata keçirildiyini, nəticədə
Azərbaycan qazının regional və Avropa bazarlarına tədarük
olunduğunu qeyd edib: “Azərbaycan qazı hazırda 7 ölkəyə nəql
edilir. Cənub Qaz Dəhlizinin genişlənməsi, Həmrəylik Halqası və
digər təşəbbüslər təchizat coğrafiyasının genişləndirilməsi
perspektivi yaradır. Burada əlaqələndirilmiş fəaliyyətə və geniş
əməkdaşlığa ehtiyac var.”
Türkiyənin uzun illər Azərbaycan qazının ən böyük bazarı olduğu və
yeni bazarlara doğru planlarda da ölkəmizin vacib tərəfdaşı olduğu
qeyd edilib.
Nazir, həmçinin neft-qaza mövcud münasibəti enerji təhlükəsiziliyi
ilə yanaşı, ətraf mühit üçün də problemlərə yol açan, enerji
bazarlarında qeyri-sabitliyi artıran yanaşma kimi dəyərləndirib.
“Neft-qazdan tamamilə imtina 85%-i karbohidrogenlərdən, 55%-i
neft-qazdan ibarət mövcud enerji sisteminin az bir vaxtda
transformasiyasının və enerji trilemmasının həlli deyil. Enerji
təhlükəsizliyi, iqtisadi əlçatanlıq və ekoloji davamlılıq nəzərə
alındıqda enerji keçidi kifayət qədər uzun bir prosesdir.
Balanslaşdırılmış enerji sisteminə nail olmaq üçün neft və qaz
sahəsinə investisiyaların davam etdirilməsi zərurəti şübhə altına
alınmamalı, paralel olaraq bərpa olunan enerji mənbələrindən
istifadə genişləndirilməlidir. Məhz özünün və tərəfdaşlarının
enerji təhlükəsizliyini təmin etmiş ölkələr düzgün, rasional enerji
keçidi siyasət həyata keçirə bilirlər”, deyə nazir əlavə edib.
xxx
14:14
Energetika naziri Pərviz Şahbazov "Rusiya Enerji Həftəsi" çərçivəsində keçirilmiş müzakirələrdə çıxış edib.
Trend xəbər verir ki, bu barədə nazir "X" (tvitter) sosial şəbəkə hesabında bildirib.
"Rusiya Enerji Həftəsi"ndə neft-qaz sektorunda turbulentliklərindən, Azərbaycanın qaz tədarükü bazarlarının şaxələndirilməsindən, balanslaşdırılmış enerji sistemində neft-qaz və "yaşıl enerji"nin birgə rolundan danışdıq", - deyə o, qeyd edib.