Bakı. Trend:
Çinin "Fareo Elevator" (Guangdong) şirkəti məhsullarını Azərbaycan
bazarına təqdim etmək niyyətindədir.
Bu barədə Trend-ə açıqlamasında şirkətin beynəlxalq əməkdaşlıq
şöbəsinin rəhbəri Minq fenq Huanq ötən gün keçirilən Azərbaycan-Çin
İqtisadi və Ticarət Əməkdaşlığı Konfransı çərçivəsində deyib.
O, Bakıya ilk səfərinin olduğunu bildirib və daha sonra şirkət
barədə məlumat verib: "Azərbaycana gəldiyim üçün çox şadam. Əvvəlcə
onu deyim ki, biz çinli lift istehsal edən bir fabrikik. Fabrikimiz
Guangdong əyalətinin Foşan şəhərində yerləşir. Şirkətimizdə 500-ə
yaxın əməkdaş fəaliyyət göstərir".
Şirkət rəsmisi məhsullarını Azərbaycan bazarına təqdim etmək
hədəflərinin olduğunu vurğulayıb: "Biz bir çox ölkələrə
məhsullarımızı ixrac edirik. Ümid edirəm ki, Azərbaycanın
şəhərsalma inkişafı modernləşdikcə, daha çox göydələnlər inşa
olunduqca, bizim liftlərə ehtiyac yaranacaq".
"Bizim lift məhsullarımız yüksək keyfiyyətlidir. Ümid edirəm ki,
azərbaycanlı dostlarımız məhsullarımızı görmək üçün Guangdonga
gəlib tanış ola bilərlər", - deyə Minq Huanq qeyd edib.
Çinin lift istehsalı müəssisəsi Azərbaycanla əməkdaşlıqda maraqlıdır
