Azərbaycan, Bakı/ Trend , müxbir İ.Xəlilova/ Azərbaycanla 2007-2010-cu illər üçün nəzərdə tutulmuş yeni əməkdaşlıq strategiyası çərçivəsində, Qara Dəniz İnkişaf Bankı (QDİB) 4 il ərzində 8 əməliyyatın Direktorlar Şurası tərəfindən imzalanacağını planlaşdırır. Bu barədə məlumatı İqtisadi İnkişaf Nazirliyindən veriblər. Bunlardan ümumilikdə 40 milyon SDR (ildə orta hesabla, təxminən 10 milyon SDR) təşkil edən 7 əməliyyatın imzalanması gözlənilir.
Bank yeni orta müddətli (2007-2016-cı illər) Yoxsulluğun Azaldılması və İnkişaf Proqramının həyata keçirilməsi üçün yardım göstərilməsini diqqət mərkəzində saxlayacaq.
İnfrastrukturun müasirləşdirilməsi, kənd təsərrüfatı məhsullarının çatdırılma yollarının inkişaf etdirilməsi, fermer və fermer fəaliyyəti üçün maliyyə mexanizmləri yaradaraq, Bank kənd təsərrüfatında məhsuldarlığın artırılmasına yönəlmiş layihələrə üstünlük verir.
Qara Dəniz İnkişaf Bankı strateji mövqedən çıxış edərək, istehsal, idxalın əvəz olunmasına dair orta həcmli layihələri təyin etməyə cəhd göstərəcək və digər beynəlxalq maliyyə institutları ilə əlavələr axtarmaq niyyətindədir.
Bank, həmçinin, lizinq və sığorta ilə əlaqəli əməliyyatların maliyyələşməsi, habelə, kəndlərin inkişafı üçün mikromaliyyələşməni nəzərdən keçirir.
Qara Dəniz İnkişaf Bankı mikro və kiçik müəssisələrə kredit verən Azərbaycan Mikromaliyyə Bankının təsisçilərindən biridir. Qara Dəniz İnkişaf Bankı gələcəkdə də bu banka maliyyə dəstəyi göstərməkdə davam etmək niyyətindədir.
Gələcəkdə kiçik və orta sahibkarlığın maliyyələşməsi kredit xətti, aksiya fondu və digər kredit, aksiya və zəmanət formalarında həyata keçirilə bilər.
Azərbaycanla fəaliyyətə başlayandan QDİB ümumi dəyəri 32 073 700 dollar olan 9 layihəni maliyyələşdirib. Azərbaycan Beynəlxalq Bankı, Bank Respublika, Texnika Bank, Azərdəmiryolbank, Kapital Bank, Unibank və Azərbaycan Mikromaliyyə Bankına kredit xətti açılıb.
