Azərbaycan,Bakı/ Trend , müxbir İ.Xəlilova/ Bazar ertəsi hökumətdən verilən xəbərə görə, Misir hökumət nümayəndə heyəti Azərbaycana dekabrın 2 - dən 7 - dək planlaşdırılan səfərini təxirə salıb. Hökumət nümayəndələri və Misirin biznes - dairələrinin üzvlərindən ibarət nümayəndə heyətinin səfəri qeyri -müəyyən vaxtadək təxirə salınıb. Lakin istisna deyil ki, bu səfər ilin sonuna kimi baş tutsun. Səfərin proqramına biznes - forum və iqtisadi, elmi - texniki əməkdaşlıq üzrə Azərbaycan - Misir hökumətlərarası komissiyanın 3 - cü iclasının keçirilməsi daxildir. Hökumətlərarası komissiyanın Azərbaycan tərəfindən həmsədri İqtisadi İnkişaf naziri Heydər Babayev, Misir tərəfdən Beynəlxalq Əməkdaşlıq naziri Faiz Əbu Əl Naqadır. Bundan əlavə, Misir nümayəndə heyəti Abşerondakı müəssisələrlə tanış olmaq niyyətində olub. Yanvar - fevral ayları ərzində iki ölkə arasında mal dövriyyəsi 1.727 mln. dollar təşkil edib. Bununla yanaşı, idxal əməliyyatları 1.688 mln. , ixrac əməliyyatları 0.038 mln. dollar dəyərində həyata keçirilib.Misirdən Azərbaycan Respublikasına gətirilən malların nomenklaturasına düyü, dərman preparatları, cihazlar, mexanizmlər, yük avtomobilləri, rezin şinlər və s.daxildir. Azərbaycandan Misirə tunel qazmaq üçün burğu detalları, xalçalar, mebel, yataq dəsti və s. aparılır.
...