Azərbaycan, Bakı / Trend , müxbir İ.Xəlilova / Azərbaycanın İqtisadi İnkişaf Nazirliyi tullantıların emalı zavodunun tikintisi layihəsi çərçivəsində, məsləhətçi xidmətlərinin göstərilməsi məqsədilə, Britaniyanın "Curry& Brown" şirkəti ilə müqavilə imzalayıb. Bu barədə cümə axşamı nazirliyin investisiya siyasəti şöbəsinin rəhbəri Əsgər Ələkbərov məlumat verib.
Müqaviləyə əsasən, 16 həftə ərzində məsləhətçi tullantıların emalı zavodunun tikintisi və idarə edilməsi üçün podratçının müəyyən olunması ilə bağı tender sənədlərini, eləcə də, Bakı və Abşeronda bərk məişət tullantılarının idarə edilməsi üzrə strategiyanı hazırlamalıdır.
Ələkbərovun sözlərinə görə, tender üç həftədən sonra elan olunacaq.
İqtisadi inkişaf nazirinin müavini Mikayıl Cabbarov hesab edir ki, Azərbaycanda məişət tullantılarının yandırılması və elektrik enerisinin istehsalı üzrə ilk zavodun tikintisinə 2008-ci ilin birinci yarısında başlanacaq.
"Bu, çox böyük layihədir və tullantıların emalında istifadə olunan texnologiyalar mürəkkəbdir. Bununla yanaşı, layihəyə maraq göstərən şirkətlərin analoji müəssisələrin tikintisi ilə bağlı təcrübəsinin, bu müəssisələri idarə etmə imkanlarının olması, maliyyələşmə və tikinti şərtləri də nəzərə alınır" - deyə Cabbarov bildirib.
Cabbarovun fikrincə, sənədlərin hazırlanmasına 3-4 həftə tələb olunur. Daha sonra sənədlər, tenderdə iştirak etmələri üçün, iddiaçılara təqdim olunacaq. İddiaçılara təklifləri təqdim etmək üçün 6 həftə lazım olacaq. İlkin olaraq, qiymətləndirmə üçün üç şirkətdən təkliflər təqdim olunub, bu şirkətlərə Yaponiyanın EBARA, Avstriyanın EVN və Fransanın CNİM şirkətlərə daxildir.
Zavodun illik gücünün 500 min ton olması planlaşdırılır.
Rəsmi məlumatlara görə, Bakıda və Bakıdan kənarda hər il 1 mln. tona yaxın məişət tullantıları toplanır.
Layihə tamamilə dövlət vəsaiti hesabına maliyyələşəcək.
