Azərbaycan, Bakı, 14 yanvar/ Trend , müxbir İ.Xəlilova/ 2007-ci ilin yanvar-noyabr ayları ərzində dövlət büdcəsinin gəlir hissəsinə faktiki daxilolmalar, ötən ilin analoji dövrü ilə müqayisədə 53.6% artaraq, 5566.1 mln. manat (ÜDM 26.7%-i) təşkil edib. Bu barədə bazar ertəsi hökumətdən məlumat veriblər.
Dövlət büdcəsinin xərcləri 55.3% artaraq, 4841.4 mln. manat (ÜDM-in 23.3%-i) olub. Dövlət büdcəsinin profisiti 11 ay ərzində 724.7 mln. manat olub və ÜDM-in 3.5%-ini təşkil edib.
Dövlət büdcəsinin gəlir hissəsinin strukturunda 76.1% (4238.2 mln. manat) Vergilər Nazirliyinin hesabına təmin edilib. Vergi yığılmaları üzrə proqnozların yerinə yetirilməsi 106.4% təşkil edib. Gömrük rüsumları və vergilərdən daxilolmalar proqnozların 101.4% yerinə yetirilməsi ilə 711.9 mln. manat (xüsusi çəkisi 12.8%) təşkil edib.
Hesabat dövrü ərzində ƏDV-dən 1055.4 mln. manat daxil olub və bu, ümumi gəlirin 19%-ni təşkil edir. Mənfəət vergisi 2383 mln. manat (42.8%) , gəlir vergisi 519.4 mln. manat (9.3%), aksiz vergisi 356.3 mln. manat (6.4%) , xarici iqtisadi fəaliyyətə olan vergilər isə, 278.2 mln. manat (5%) təşkil edib.
Yanvar-noyabrda büdcə vəsaitlərindən əhalinin sosial təminatı və müdafiəsinə 546.4 milyon manat (11.3 faiz), təhsilə 607.8 milyon manat (12.5 faiz) , səhiyyəyə-197.5 mln. manat (4.1%) prokurorluq, təhlükəsizlik, hüquq-mühafizə orqanlarının, məhkəmə hakimiyyətinin təminatına 313.8 mln. manat (6.5%) , iqtisadiyyata investisiya qoyuluşuna 1854.1 mln. manat (38.3%) , yaşayış-kommunal xərclərinə 75.6 mln. manat (1.6%), kənd, meşə təsərrüfatı, həmçinin, balıqçılığa 197.1 mln. manat (4.1%) xərclənib. Xərclərin 29.1 faizini (1408.8 milyon manatını) əhaliyə əmək haqqı, pensiya və müavinət ödəmələri təşkil edib.