Azərbaycan, Bakı, 15 yanvar / Trend , müxbir İ.Xəlilova/ Azərbaycan Nəqliyyat Nazirliyi yanvarın 20-nə qədər Bakıda "Nəqliyyatın intellektual idarə olunması" sisteminin yaradılma layihəsi üzrə texniki tapşırıqları Koreya tərəfinə təqdim etməyə hazırlaşır. Bu barədə nazirliyin Nəqliyyat siyasəti və iqtisadiyyatı şöbəsinin direktoru Sədrəddin Məmmədov məlumat verib. Bu sistemin tətbiq edilməsində Azərbaycana Cənubi Koreyanın Nəqliyyat Nazirliyi yardım göstərəcək. Nazirlik ilə 24 aprel 2007-ci il tarixində Seulda niyyət memorandumu imzalanıb.
Nazirlik üçün layihəni Cənubi Koreyanın SK C& C konsorsiumu hazırlayıb. Konsorsium burada araşdırmalar aparıb və tövsiyələri ölkə hökumətinə təqdim edib. Araşdırmalara əsasən, bu sistemin tətbiq edilməsi nəticəsində işıqfor və avtobus dayanacaqlarının sayı qaydaya salınacaq. Belə ki, onların sayı körpü və piyada keçidlərinin tikilməsi nəticəsində azalıb. Bu sistemin yaradılması avtomobil nəqliyyat vasitələrinin hərəkəti və sürət, dayanacaqlar, nəqliyyat qəzaları, tıxac və digər hallar barədə mərkəzi dispetçer məntəqəsinə operativ məlumat göndərməyə imkan verəcək.
İlkin hesablamalara görə, "Nəqliyyatın intellektual idarə olunması" sistemi iki mərhələ üzrə yaradılacaq. Birinci mərhələ üzrə 2008-ci ilin sonuna qədər paytaxtın mərkəzindən başlayaraq Heydər Əliyev prospekti istiqamətində Əzizbəyov dairəsinə qədər bu sistemin tətbiq edilməsi nəzərdə tutulur. İkinci mərhələdə isə sistem bütün paytaxt üzrə genişləndiriləcək və bu tədbirlərin həyata keçirlməsi üçün 2009-cu ilin sonuna qədər vaxt ayrılıb.
Bakıda bu cür sistemin yaradılmasında məqsəd nəqliyyat sisteminin - sərnişin daşımaları, avtomobil marşrutları, tığacların aradan qaldırılması və maşın dayanacaqlarının bir məntəqədən idarə olunması ilə əlaqədardır.
Məmmədovun sözlərinə görə, layihənin dəyəri smetanın hazırlanmasından sonra dəqiqləşdiriləcək. Lakin ilkin qiymətləndirmə 55-60 mln. dollar təşkil edir. Əvvəllər isə bu məbləğin 52 mln. dollar olğudu bildirilirdi. Bu vəsaitin dövlət büdcəsindən cəlb edilməsi planlaşdırılır. Lakin digər variantlar da nəzərdən keçirilə bilər.
