Azərbaycan, Bakı, 07 fevral / Trend , müxbir İ.Xəlilova / Prezidentin sərəncamına əsasən, ticari-iqtisadi əməkdaşlıq üzrə Azərbaycan-Tacikistan hökumətlərarası komissiyanın yeni tərkibi təsdiq olunub. Sənəddə bildirilirdiyinə görə, hökumətlərarası komissiyaya iqtisadi inkişaf naziri Heydər Babayev rəhbərlik edəcək.
Komissiyanın tərkibinə fövqəladə hallar, xarici işlər, sənaye və energetika, nəqliyyat, kənd təsərrüfatı, mədəniyyət və turizm, rabitə və informasiya texnologiyaları nazirlərinin müavinləri, Xaricdə Yaşayan Vətəndaşlarla İş üzrə Dövlət Komitəsinin sədri, Azərbaycanın Tacikistandakı səfiri, Nazirlər Kabineti Aparatının MDB ölkələri ilə iqtisadi əlaqələr üzrə şöbə direktoru daxildir.
Azərbaycan və Tacikistan arasında hökumətlərarası komissiya 2007-ci il martın 15-də Düşənbədə imzalanan ticari-iqtisadi əməkdaşlığa dair müqavilə əsasında yaradılıb.
Komissiya tərkibinin formalaşdırılması ilə əlaqədar olaraq, Xarici İşlər Nazirliyinə Tacikistan tərəfinin xəbardar edlməsinə dair tapşırıq verilib.
