Azərbaycan, Bakı, 11 fevral/ Trend , müxbir Q.Cəbiyev/ Azərbaycan Nəqliyyat Nazirliyi Bakının nəqliyyat infrastrukturunun təkmilləşdirilməsi layihəsinin davam etdirilməsi üzrə təkliflər hazırlayıb. Bu barədə bazar ertəsi nəqliyyat naziri Ziya Məmmədov məlumat verib.
Məmmədovun sözlərinə görə, sabah təkliflər üzrə yekun müzakirələr keçiriləcək və bundan sonra təkliflər Azərabaycan prezidenti İlham Əliyevin təsdiqinə veriləcək.
Yeni təkliflər Bakıda yeni körpülərin, keçidlərin və dayanacaqların tikintisini nəzərdə tutur.
Azərbaycan Nəqliyyat Nazirliyi 2008-2010-cu illər üçün Bakı şəhərinin nəqliyyat infrastrukturunun təkmilləşdirilməsi üzrə əlavə fəaliyyət planı hazırlayıb.Tədbirlər planı çərçivəsində 11 körpü, 10 piyada keçidi və 13 çoxmərtəbəli avtomobil dayanacağının tikintisi nəzərdə tutulur.
2006-2007-ci illər üçün Bakı şəhərinin nəqliyyat infrastrukturunun təkmilləşdirilməsi proqramı çərçivəsində yol ayrıcları və piyada keçidlərinin tikintisinə 150 mln. manat xərclənib. Ümumilikdə 9 körpü və 13 piyada keçidinin istismara veriləcəyi nəzərdə tutulur.
