Azərbaycan, Bakı, 29 fevral / Trend , müxbir S.Babayeva / Azərbaycan Vergilər Nazirliyində Naxçıvan Muxtar Respublikasında (NMR) yeni yaradılacaq tütün müəssisəsi qeydiyyatdan keçib. Nazirliyin verdiyi məlumata görə, "Naxçıvan Tütünçülük" ASC-nin nizamnamə kapitalı 40226 manat təşkil edir. Müəssisənin təsisçisi NMR-in İqtisadi İnkişaf Nazirliyidir.
Cümə günü Kənd Təsərrüfatı Nazirliyindən verilən məlumata görə, Azərbaycanda yeganə tütün istehsalçısı "European Tobacco Baku" ASC-dir. Xammal təchizatı ilə məşğul olan müəssisələrin sayı 10-a çatır.
2000-ci ilin fevral tarixindən "European Tobacco Baku" ASC 260 mln. manatlıq filtrli siqaret istehsal edib. Bu müddət ərzində Mərkəzi və Şərqi Afrika, Cənub-qərbi Asiya və MDB ölkələrinə 73 mln. dollarlıq məhsul ixrac edilib.
Kənd Təsərrüfatı Nazirliyindən məlumat verilib ki, bu il tütün yarpaqlarının istehsalı 3 min ton həcmində proqnozlaşdırılır.
2007-ci ildə tütün istehsalı 1191 hektar əkin sahəsi üçün 2,9 min ton təşkil edib. Hava şəraitinin pis keçməsi məhsulun 1,7 min ton azalmasına səbəb olub.
Azərbaycanda tütün yarpaqları əsasən Şəki-Zaqatala iqtisadi bölgəsində - Zaqatala, Şəki, Qax, Qəbələ və Balakən rayonlarında yetişdirilir.