Azərbaycan, Bakı, 04 aprel/ Trend , müxbir A.Bədəlova/ ABŞ iqtisadiyyatının resessiyası bir çox münasibətlərdə bütün dünyaya təsir edəcək. Britaniyanın "Morgan Stanley" bankının icraçı direktoru və baş valyuta iqtisadçısı Stefan Cen belə hesab edir.
"Güman edirəm ki, maliyyə böhranından sonra biz daha pis vəziyyətlə qarşılaşa bilərik", - Cen cümə günü Trend a bildirib. O güman edir ki, böhrandan sonra əsas səylər iqtisadiyyatın artımına deyil, onun bərpasına yönəldiləcək və bu da məhdud xarakter daşıyacaq.
Cenin rəyinə görə, ABŞ iqtisadiyyatının resessiyası səthi və qısa olacaq. "Böhran nəticəsində çox ehtimal ki, ABŞ-da istehlak ölkəni davamlı resessiyada saxlamaycaq qədər zərər görəcək. Lakin yenə də resessiyadan sonra iqtisadiyyatın bərpa edilməsi böhranın təbiətinə görə, yəni tələbatın azalmasına görə məhdud xarakter daşıyacaq", - o bildirib.
Dünya iqtisadiyyatının artım templərindən danışan Cen bildirib ki, Avropa İttifaqı və Yaponiyada Asiya və Latın Amerikası ölkələri ilə müqayisədə artımın nəzərəçarpacaq dərəcədə azalması müşahidə ediləcək.
"İnkişafda olan bazarlar ABŞ-dan gələn mənfi zərbəni tam olmasa da, kompensasiya etmək üçün kifayət qədər müsbət gücə malikdirlər", - o bildirib.
Bu həftə Federal Ehtiyat Sisteminin rəhbəri Ben Bernanki ABŞ Konqresinin iqtisadiyyat üzrə komitəsində çıxışında, ilk dəfə olaraq resessiyanın yaranma mümkünlüyünü etiraf edib. Onun sözlərinə görə, ABŞ ÜDM-i ilin birinci yarısında çox aşağı templərlə artacaq və hətta azala bilər. O həmçinin qeyd edib ki, əgər Amerika iqtisadiyyatı yüngül resessiya ilə üzləşərsə, böyük ehtimalla ondan çıxa biləcək. 2007-ci ilin sentyabrından ABŞ FES iqtisadiyyatın ipoteka bazarında böhranın təsirindən çıxmasına yardım üçün əsas faiz dərəcəsini üç faiz bəndi qədər azaldaraq 2,25 faizə endirib.
Britaniyalı ekspertin rəyinə görə, ABŞ sərhədlərindən kənardakı mərkəzi banklar Federal Ehtiyat Sisteminin ardınca yəqin ki, faiz dərəcəsini azaldacaqlar.
Bu günlərdə Beynəlxalq Valyuta Fondu (BVF) bu həftə dünya iqtisadiyyatının artımına dair öz proqnozunu 4,1 faizdən 3,7 faizədək azaldıb. BVF-in qiymətləndirməsinə görə, resessiyanın başlama ehtimalı 25 faiz təşkil edir. BVF məruzənin tam versiyasını aprelin 9-da təqdim etmək niyyətindədir.
Müəlliflə əlaqə saxlamaq üçün elektron ünvan: [email protected]
