Azərbaycan, Bakı, 23 aprel / Trend , müxbir İ.Xəlilova/ Azərbaycanın Maliyyə Nazirliyi Ələtdə yeni beynəlxalq ticarət limanının tikinti layihəsinin maliyyələşdirilməsi barədə təkliflər verilməsi üçün "Societe General", "BNP Paribas" və Çexiyanın "Estrimbankı"na xahişlə müraciət edib. Bu barədə çərşənbə günü Azərbaycanın Nəqliyyat Nazirliyindən məlumat verilib.
İlkin qiymətləndirmələrə görə, liman 396 mln. dollar, neft terminalı nəzərə alınmaqla isə 450 mln. dollardan artıq məbləğdə dəyərləndirilir. Lakin son məlumatlara görə, ilkin mərhələnin qiyməti əvvəl planlaşdırılmış 225 mln. dollardan 300 mln. dollaradək artıb.
İnfrastrukturun yaradılmasını hökumət öz vəsaitləri hesabına həyata keçirmək niyyətindədir. Lakin görülən işlərin 80 faizi xarici borclar hesabına maliyyələşdiriləcək.
Hazırda Nəqliyyat Nazirliyinin məsləhətçisi - Cənubi Koreyanın "JS Engineering & Construction" şirkəti layihənin texniki-iqtisadi əsaslandırmasının son variantını hazırlayır, paralel olaraq beynəlxalq maliyyə təşkilatları ilə danışıqlar aparılır. Ölkə hökumətinin müvafiq icraçı orqanlarının təklif etdiyi əlavə tədbirlər hesabına layihənin son variantının qiymətinin artması gözlənilir. Əsasən elektrikləşdirmə, su təchizatı və neft terminalının tikintisi üzrə işlərin daha geniş şəkildə aparılması üzrə təkliflər qəbul olunub.
"Ümumiyyətlə, yeni multimodullu dəniz limanı tikiləcək, loqistik mərkəzlə yanaşı gələcəkdə bu ərazini azad ticarət zonasına çevirmək planlaşdırılır" - deyə nazirlikdəki mənbə məlumat verib.
Limanın təməlinin qoyulması 2008-ci ilin birinci yarısında nəzərədə tutulub.
Limanın tikintisinin ilkin mərhələsi 2008-11-ci illəri, ikinci 2011-13-cü illəri, üçüncü isə 2013-2015-ci illəri əhatə edəcək. Hər mərhələdə müəyyən infrastrukturun yaradılması planlaşdırılıb - quru yüklər üçün meydança, konteyner terminalı, böyük park və s.
Aprelin 23-nə olan rəsmi məzənnə 0,8276 AZN/USD təşkil edib.
Müəlliflə əlaqə saxlamaq üçün elektron ünvan : capital
