Azərbaycan, Bakı, 24 aprel/ Trend müxbir S.Babayeva/ Azərbaycan Ümumdünya Heyvanların Sağlamlığının Müdafiəsi Təşkilatının (OİE- World Organisation for Animal Health) 76-cı Baş sessiyasında iştirak edəcək. Sessiya mayın 25-29-da Parisdə keçiriləcək. Cümə axşamı OİE-dən verilən məlumata görə, sessiyanın işində Azərbaycandan Dövlət Baytarlıq Xidmətinin rəisi İsmayıl Həsənov iştirak edəcək.
"Dünyanın 172 ölkəsindən və 30 beynəlxalq təşkilatdan olan nümayəndə heyətləri heyvanların sağlamlığı və dünyada heyvanların müdafəsinin təkmilləşdirilməsi məsələlərini müzakirə etmək üçün görüşəcəklər", - OİE-dən bildiriblər.
İclasın gündəliyinə heyvanlarla və heyvan məhsulları ilə dünya ticarətinin təhlükəsizliyinə dair beynəxalq standartların qəbul edilməsi, heyvanların xəstəlikləri ilə mübarizə və baytarlıq xidmətlərinin keyfiyyətinin yaxşılaşdırılması, təşkilatın Komissiyalarında boş yerlərə seçkilər daxildir.
Sessiyanın açılışında OİE prezidenti və Baş direktoru, təşkilata üzv ölkələrin nazirləri və nazir müavinləri, o cümlədən Bolqarıstanın Baş naziri, İranın, Tanzaniyanın kənd təsərrüfatı naziri və ABŞ-ın kənd təsərrüfatı üzrə departamentinin katibi iştirak edəcəklər.
