Azərbaycan, Bakı, 25 aprel / Trend , müxbir İ.Xəlilova / Asiya İnkişaf Bankı (AİB) Azərbaycanda bank sektoru üzrə maliyyələşdirmə həcmini əvvəllər nəzərdə tutulan 120 mln. dollardan 150-200 mln. dollara qədər genişləndirməyə hazırdır. Bu barədə bankın Bakıdakı nümayəndəliyindən bildiriblər. Bu vəsaitin ilin sonuna qədər mənimsənilməsi planlaşdırılır.
Bu günə qədər AİB tərəfindən Azərbaycan bankları üçün 56 mln. dollar həcmində kredit xətti ayrılıb. Asiya Bankı Azərbaycanın beş bankına əlavə vəsait ayırmağı planlaşdırır. Hazırda bu məsələ üzrə danışıqlar aparılır. Portfelin genişləndirilməsi "Standard Bank", "Texnika Bank", Azərbaycan Beynəlxalq Bankı və digər banklar üçün kreditin açılması nəticəsində mümkün olacaq.
AİB Azərbaycanın bank sektorunun birbaşa maliyyələşdirilməsi üzrə əsas oyunçuya çevrilməyə başlayıb. Kiçik və orta sahibkarlığa dəstək, ticarətin maliyyələşdirilməsi proqramı çərçivəsində AİB "Bank Respublika", "Bank of Baku", Azərbaycanın Mikromaliyyələşdirmə Bankı, "AGBank"ı maliyyələşdirib. Azərbaycan Beynəlxalq Bankı və "Bank Respublika" üçün subordinasiya kreditləri açılıb.
Aprelin 25-i üçün rəsmi məzənnə 0,8289 AZN/USD təşkil edir.
Müəlliflə əlaqə saxlamaq üçün elektron ünvan : [email protected]