Azərbaycan, Bakı, 02 may / Trend / Azərbaycan Dövlət Dəmir Yol İdarəsi Bakı-Böyük Kəsik dəhlizi boyunca enerji təchizatı sisteminin yenidən qurulmasına texniki yardımın göstərilməsi, siqnalizasiya sisteminin yenilənməsi və lokomotivlərin alınması üçün şirkətlərin müəyyən olunması üzrə müsabiqə elan edib.
Layihə Azərbaycan dəmir yolu nəqliyyatına və ticarətinə yardım proqramı çərçivəsində həyata keçiriləcək və Beynəlxalq Yenidənqurma və İnkişaf Bankının maliyyə dəstəyi ilə reallaşdırılacaq. Layihə proqramının ilk komponenti Şərq-Qərb magistral yolunun bərpası, həmçinin, yol təsərrüfatı, siqnal sistemi və enerji təchizatı sisteminin yenidən qurulmasından ibarət olacaq. Proqramın bu komponenti çərçivəsində, Şərq-Qərb dəhlizi üzrə elektrik təchizatının yeni 27,5 kVt-lıq sistemə keçidinin həyata keçirilməsi, o cümlədən yeni elektrik stansiyaları, zəncirvari xətlər və siqnal sistemlərinin yaradılması prosesi maliyyələşdiriləcək. İkinci komponent çərçivəsində isə, yeni lokomotivlərin (50 yeni elektrik magistral lokomotivləri) alınması nəzərdə tutulub.
Layihə çərçivəsində 3,3 kVt-lıq sabit gərginlikdən 27,5 kVt-lıq dəyişən gərginliyə keçid üzrə sistemin layihələndirilməsi və quraşdırılması planlaşdırılır.
Şirkət tender sənədlərini hazırlamalı, tender təkliflərini qiymətləndirməli, həyata keçirilən işlərin monitorinqini də aparmalı və Bakı-Böyük Kəsik (təxminən 500km) dəmir yolu dəhlizi boyunca siqnal sisteminin yenidən qurulması, lokomotivlərin alınması üzrə hesabat hazırlamalıdır.
Tapşırıqların yerinə yetirilmə müddəti 40 aydır.
Təkliflər 2008-ci il iyunun 2-dək Azərbaycan Dövlət Dəmir Yolu İdarəsində qəbul olunacaq.