Azərbaycan, Bakı, 14 may / Trend , müxbir İ.Xəlilova/ Ümumdünya Ticarət Təşkilatına (ÜTT) üzv dövlətlər Azərbaycan tərəfindən ticarət rejimi və bazar xidmətlərinin liberallaşdırılması ilə bağlı təkidlərini davam etdirirlər. Bu barədə Danışıqlar qrupunun rəhbəri, Azərbaycanın xarici işlər nazirinin müavini Mahmud Məmmədquliyev bildirib. Xüsusilə, birbaşa filialların açılması vasitəsilə bank bazarına, 100 faizlik xarici kapital ilə törmə strukturların yaradılması yolu ilə ölkənin sığorta bazarına daxil olma üzrə tələblər qüvvədə qalmaqdadır.
Azərbaycan aprel ayında Norveç, Şri-Lanka, Hindistan, Cənubi Koreya, mayda isə ABŞ, Ekvador, Yaponiya və Çinin Tayvan əyaləti ilə danışıqlar aparıb.
"Azərbaycanın yenicə danışıqlara başladığı yeni ölkələr - Norveç, Şri-Lanka, Hindistan da son dəfə hökumət tərəfindən təklif olunan baum-tariflərin azaldılmasını təklif edir", - deyə Məmmədquliyev bildirib.
Nazir müavini hesab edir ki, tədricən bu ölkələrin siyahısı genişlənir və onlardan hər hansı biriylə danışıqları başa çatdırmaq barədə danışmaq hələ tezdir
Bu günədək Türkiyə, Oman Sultanlığı, Birləşmiş Ərəb Əmirlikləri ilə danışıqlar başa çatdırılıb və danışıqlar protokolu imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan artıq razılıq verib və bu prsedur hökumətlərarası komissiyanın növbəti iclasında baş tuta bilər. Məmmədquliyevin sözlərinə görə, Gürcüstan ilə bir məsələ hələ razılaşdırılmamış qalır.
"Gürcüstanla danışıqların başa çatdırılmasına baxmayaraq, bu yaxınlarda o, nəqliyyat vəsitələri üçün normanın ləğv edilməsi barədə təklif irəli sürüb. Bu məsələ hazırda Azərbaycan hökuməti tərəfindən nəzərdən keçirilir"- deyə nazir müavini bildirib.
Azərbaycan 1997-ci ildən ÜTT-də müşahidəçi statusuna malikdir.
Müəlliflə əlaqə saxlamaq üçün elektron ünvan : [email protected]